काठमाडाैँ । नेपाल प्रिमियर लिग एनपीएलको मंगलबार भएको सुदूरपश्चिम रोयल्सविरुद्ध खेलमा विराटनगर किङ्ग्सले लज्जास्पद हार व्योहोरेको छ । सुदूरपश्चिम रोयल्सका क्याप्टेन दिपेन्द्र सिंह ऐरीको अर्धशतकमा १८३ रनको लक्ष्य पाएको विराटनगर किङ्सले १६.१ ओभरमा ९२ रन मात्र बनाउन सफल भएको हो । 

कीर्तिपुरस्थित  टियु क्रिकेट मैदानमा भएको खेलमा विराटनगरका कप्तान सन्दीप लामिछानेले टस जितेर पहिले बलिङ रोजेका थिए।  ब्याटिङमा जबरजस्त प्रदर्शन गरेको सुदुरपश्चिमविरुद्ध मैदानमा उत्रिएको विराटनगर किङ्ग्सविरुद्ध बलिङमा पनि सुदुरपश्चिमले धमाकेदार प्रस्तुती देखाएको हो ।

१८३ रनको टार्गेट पछ्याउन ओपनरका रुपमा मैदानमा उत्रिएका विराटनगरका मार्टिन गप्टिल १ रन पनि बनाउन नपाउँदै आउट भएका थिए । उनी खेलको तेस्रो बलमै बाहिरिएका थिए । त्यस्तै अर्का ओपनर लोकेश बम ३.४ ओभरमा खेलबाट बाहिरिएका थिए ।

सुदुरपश्चिम रोयल्सका लागि स्कट कुगेलेइन र अविनाश बोहोराले ३÷३ विकेट दिलाए भने ब्रान्डन म्याकमुलेनले १ विकेट, दीपेन्द्र सिंह ऐरीले १ विकेट, इशान पाण्डेले १ र सैफ अली जैबले पनि १ विकेट दिलाए । 

एनपीएलको पहिलो संस्करणमा विराटनगरले दोस्रो खेल खेलेको हो भने  सुदूरपश्चिम रोयल्सको यो पहिलो खेल हो । विराटनगरले यसअघि जनकपुर बोल्ट्ससँगको खेलमा आठ विकेटले पराजित भएको थियो ।