राजधानीमा चलेको किशोरीको डिम्ब बेच्ने धन्दामा प्रहरीको अपरेसन !

काठमाडौँ । एउटा यस्तो धन्दा ! कलिला किशोरीहरुलाई पैसाको प्रलोभनमा पारिन्छ । उनीहरुको कलिलो शरीरमा विकास हुँदै गरेको डिम्ब बेच्नको लागि राजी बनाइन्छ । त्यसपछि उनीहरुलाई क्लिनिक लगिन्छ । उनीहरुको शरीरमा भर्खरै विकास हुँदै गरेको डिम्लाई फोर्स डेभलप गराउनको लागि अनेकथरी सुई लगाइन्छ । एक हप्तादेखि १० दिनसम्म निरन्तर सुई लगाइन्छ । त्यसपछि त्यो अण्डा विकसित हुन्छ । अनी बेहोस पारेर औजारको प्रयोग गरी यौनाङ्गबाट त्यो अण्डा निकालेर अर्को महिलाको शरीरमा राखिन्छ । किशोरीलाई १० हजार दिइन्छ र त्यो अण्डा किन्ने क्रेताबाट १८ देखि २० लाखसम्म उठाउने गरिन्छ । 

असार ३० गते सिआईबीमा दुई किशोरीका परिवार जाहेरी लिएर लाजिम्पाटस्थित केन्द्र्रीय अनुसन्धान ब्यूरो सीआईबीको कार्यालयमा पुगे । उनीहरुको गुनासो थियो आफ्नो छोरीको डिम्ब काठमाडौँकै एक अस्पतालले अरु कसैलाई विक्रि गरे । यो विषय प्रहरीका लागि पनि नौलो थियो । सीआईबीका अधिकारीहरुले यो विषयलाई विशेष प्राथमिकता दिए र थप विवरणहरु खुल्न थाले । 

जाहेरी दिन पुगेका पीडित किशोरीका परिवारले बताएअनुसार उनीहरुले छोरीको मानसिक तथा शारिरिक अवस्थामा परिवर्तन देखिएपछि डाक्टरसँग परामर्श लिएका थिए । सो क्रममा ति किशोरीले आफूलाई प्रलोभनामा पारिएको र आफूमाथि भएका हर्कतहरुबारे बताइन् । त्यसपछि परिवार प्रहरीकोमा पुगेका थिए । 

यसरी किशोरीको शरीरबाट निकालेर डिम्ब बेच्ने अस्पताल थियो काठमाडौँको बबरमहलमा सञ्चालित होप फर्टिलिटी एन्ड डाइग्नोस्टिक क्लिनिक । किशोरीका परिवारको जाहेरीपछि प्रहरीले ५ जनालाई नियन्त्रणमा लियो । जसमा डा.स्वस्ति शर्मा, डा.मालिनी चौधरी, डा.असिम अधिकारी, एलिसा ओली, र अस्टिना प्रधान रहेका छन् । डा.स्वस्ति शर्मा होप फर्टिलिटी एन्ड डाइग्नोस्टिक क्लिनिककी सञ्चालक हुन् । प्रहरीले पक्राउ गरी उनीहरुमाथि अनुसन्धान गर्दा उनीहरुले डिम्ब निकालेको स्वीकार गरेका छन् । 

प्रहरीले पक्राउ परेका सबैलाई सोमबार म्याद थपको लागि अदालत पेश गरेको थियो । तर अदालतले सबैलाई हाजिरी जमानीमा छाडिदिएको छ । 

यो विषयमा नेपालमा ठोस् कानुन छैन । सीआईबीका एसपी युवराज खड्काका अनुसार प्रहरीले अहिले बालबालिका सम्बन्धी कसुरमा अनुसन्धान अघि बढाएको छ । उनले यो विषयको गहिराइसम्म पुग्नेगरी अनुसन्धान भईरहेको जानकारी दिए । योसँगै प्रहरीले महाराजगञ्जस्थित एन्जल फर्टिलिटि क्लिनिकलाई पनि अनुसन्धानको राडारमा राखेको छ । 

पहिले डिम्ब विक्रि, पछि आफैँ एजेन्ट

अनुसन्धानका क्रममा पहिले अण्डा दान गर्नेहरु नै पछि एजेन्ट बनेको खुलेको छ । जस्टिना नाम गरेकी किशोरीले पहिले आफैँले अण्डा विक्रि गरेकी थिइन् । त्यसपछि उनले अन्य किशोरीहरुलाई पनि अण्डा बेच्नको लागि प्रोत्साहित गर्ने गरेको खुलेको छ । उनले मात्रै आधा दर्जन किशोरीलाई अण्डा विक्रीका लागि राजी गराएको अनुसन्धानबाट खुलेको छ । 

किन निकालिन्छ महिलाको डिम्ब

हाम्रो समाजमा चाहना भएर पनि बच्चा जन्माउन नसकेको दम्पत्तिहरु धेरै हुन्छन् । उनीहरु सन्तान पाउनको लागि जुनसुकै मूल्य तिर्न तयार हुन्छन् । विशेषगरी महिलाका कारण बच्चा बस्न नसकेका दम्पत्तिका लागि यो निकै उपयोगी हुन्छ । बच्चा जन्माउने इच्छा भएकी तर बिभिन्न कारणले बच्चा जन्माउन नसकेकी महिलालाई विक्री गर्नको लागि स्वस्थ महिलाको शरीरबाट डिम्ब निकालेर त्यसलाई प्रयोगशालामा पुरुषको शुक्रकिटसँग मिलन गराएर भ्रुण तयार गरिन्छ । र त्यो भु्रणलाई महिलाको पाठेघरमा राख्ने गरिन्छ ।

यो विषयमा के गर्न पाइन्छ के पाइन्न भनेर नेपालमा स्पष्ट कानुनी व्यवस्था नभएको जानकारहरु बताउँछन् । त्यसकारण दुई पक्षको मञ्जुरी भएको अवस्थामा यसलाई गलत भनिहाल्न मिल्दैन । तर यहाँ माइनर अर्थात उमेर नपुगेका किशोरीहरुलाई प्रयोग गरिएको छ, उनीहरुको शरीरमा अण्डा छिटो विकास गर्नको लागि इन्जेक्सनको प्रयोग गरिएको छ । नेपालको कानुनले १८ वर्ष नपुगेका किशोरीको संरक्षण गर्नुपर्ने उल्लेख गरेको छ । उनीहरुले सहमति नै दिएको भएपनि त्यो मान्य नहुने उल्लेख छ । यसरी अहिले फोर्स डिम्ब दान गरेका किशोरीहरुमा बिभिन्न शारिरिक समस्या आउने चिकित्सकहरुको भनाई छ । 

त्यतिमात्र होइन उनीहरुले निम्न आय भएका परिवारका किशोरीहरुलाई टार्गेट गरेका छन् । उनीहरुले रकमको प्रलोभन देखाएर अण्डा विक्रिका लागि प्रोत्साहन गरेको अनुसन्धानबाट खुलेको छ । प्रहरीले सोही अनुसार अनुसन्धान अघी बढाएको छ ।