चेतनदीप अयडी हत्याकाण्ड : थुनामा रहेका ६ जनालाई थुनामुक्त गर्न सर्वोच्चको आदेश

काठमाडाैँ : अनेरास्ववियु केन्द्रीय सदस्य चेतनदीप अयडीको हत्याकाण्डमा पक्राउ परेका ६ अभियुक्तलाई सर्वोच्च अदालतले साधारण तारेखमा छोड्न आदेश दिएको छ । 

सर्वोच्चका न्यायाधीशद्वय प्रकाशमानसिंह राउत र अब्दुल अजिज मुसलमानको इजलासले उक्त आदेश दिएको हो ।

२०७९ मंसिर ४ गते भएका प्रतिनिधिसभा निर्वाचनमा बाजुराको नाटेश्वरी आधारभूत विद्यालय मतदान केन्द्रमा नेकपा एमालेका तर्फबाट प्रतिनिधि बसेका अयडीलाई एक समूहले घरमै पुगेर कु्रर तरिकाले हत्या गरेको थियो । जुन भिडियो सामाजिक संजालमा भाइरल बनेको थियो । 

उक्त हत्याकाण्डमा पक्राउ परेका २४ जनाविरुद्ध जिल्ला अदालत बाजुरामा मुद्दा दायर भएको थियो। पक्राउ परेका सबैलाई जिल्ला अदालत बाजुरा र उच्च अदालत दीपायलले पुर्पक्षका लागि थुनामा पठाउने आदेश दिएका थिए।

उनकै हत्या अभियोगमा पक्राउ परेका जुद्धबहादुर अयडी, चक्रबहादुर अयडी, विनोदबहादुर अयडी, भूपाल अयडी, रुपा चौधरी अयडी र रनसिंह बहादुर अयडीलाई सर्वोच्चले भने साधारण तारेखमा छोड्न आदेश दिएकाे छ । त्यस्तै अभियुक्त धनराज थापा, जंग भन्ने शेरबहादुर अयडी, खेमराज अयडी र सागर अयडीलाई थुनामै राख्न अदालतले आदेश दिएको हो । 

पुर्पक्षका लागि थुनामा रहेका उनीहरुलाई थुनामा नै राख्नुपर्ने प्रमाणहरूबाट देखिन नआएको भन्दै सर्वोच्चले थुनामुक्त गर्न आदेश दिएको हो ।