फिफा विश्वकप : २४ वर्षपछि पाराग्वेले बदला लिँदा जर्मनी आउट

काठमाडौँ । २४ वर्षपछि बदला लिँदै पाराग्वेले चार पटकको च्याम्पियन जर्मनीलाई फिफा विश्वकप २०२६ को अन्तिम ३२ मा पराजित गरेको छ । अमेरिकाको बोष्टनमा भएको हारसँगै जर्मनी घर फर्कियो । पाराग्वेसँग पेनाल्टी सुटआउटमा पराजित भएपनि पाँचौं पटक उपाधि जित्ने जर्मनीको सपना पूरा हुन सकेन । 

निर्धारित समयको खेल १–१ को बराबरीमा सम्पन्न भएको थियो । अतिरिक्त ३० मिनेटको खेलमा समेत कुनै गोल नभएपछि खेलको नतिजा पेनाल्टी सुटआउटमा आएको थियो । पेनाल्टीमा पाराग्वे ४–३ ले विजयी भयो । 

Watch On

पाराग्वेका लागि जोसे क्यानालेले निर्णायक पेनाल्टी गोल गरेका थिए । योसँगै जर्मनीविरुद्ध पाराग्वेले २४ वर्षपछि बदला लिएको छ । सन् २००४ मा जर्मनीले जापान र दक्षिण कोरियामा भएको विश्वकपमा पाराग्वेलाई पेनाल्टी सुटआउटमै हराएको थियो । 

यस्तै, जर्मनी पहिलो पटक फिफा विश्वकपमा पेनाल्टीमा पराजित भएको छ । यसअघि लगातार चार पटक जर्मनीले पेनाल्टीमा खेल जितेको हो । जर्मनीले सन् १९८२ मा फ्रान्स, १९८६ मा मेक्सिको, १९९० मा इंग्ल्यान्ड र सन् २००६ मा अर्जेन्टिनालाई पेनाल्टी सुटआउटमा पराजित गरेर अगाडि बढेको थियो । 

योसँगै जर्मनीका गोलकिपर म्यानुअल नेउरले अन्तर्राष्ट्रिय फुटबलबाट सन्यास लिएका छन् । 

सन् २०१४ को विश्वकपपछि पहिलो पटक नकआउटमा स्थान बनाएको जर्मनी नकआउटको पहिलो खेलमै पराजित भएको हो । विश्वकपका सफल टोली दुई पटकको उरुग्वेपछि जर्मनी पनि उपाधिबाट बाहिरिएका छन् । 

यता, पाराग्वे भने सन् २०१४ देखि सन् २०२२ सम्म विश्वकपमा छनोट नै हुन सकेको थिएन । यसपटक भने अन्तिम १६ मा स्थान बनाउन सफल भयो । पाराग्वे तेस्रो पटक अन्तिम १६ मा प्रवेश गरेको हो । अब, पाराग्वेले फ्रान्स र स्विडेनबीचको विजेतासँग क्वार्टरफाइनल प्रवेशको लागि खेल्नेछ । 

पाराग्वेको जितमा गोलकिपर ओर्लान्डो लिग नायक बने । उनले काभइ हाभार्ट र निक वाल्टमेडको पेनाल्टी बचाएका थिए । पेनाल्टीमा पाराग्वेलाई जिताउन माउरिसियो, गोस्ताभो गोमेज, माथियस गालार्जा र जोस कालानेले पेनाल्टी सुटआउटमा गोल गरेका थिए । जर्मनीका लागि कप्तान जोसुअ किम्मिच, जमाल मुसिएला र नादिएम अमेरिकीले मात्रै गोल गरे । यस्तै, जोनाथन ताहाको प्रहार पोस्ट भन्दा माथिबाट बाहिर गयो ।

यसअघि जुलियो इनसिसोले ४२औं मिनेटमा गोल गर्दै पाराग्वेलाई अग्रता दिलाएका थिए  । काई हाभार्टले ५४औं मिनेटमा जर्मनीका लागि बराबरी गोल फर्काएपछि खेल अतिरिक्त समयमा गएको हो । 

यो खेलसँगै पाराग्वेसहित ब्राजिल र क्यानाडा अन्तिम १५ मा प्रवेश गरेका छन् । ब्राजिलले एसियाली महारथी जापानविरुद्ध अन्तिम मिनेटमा २–१ को जित निकालेको थियो ।