कांग्रेसको नयाँ अभियान– एनसी फर एनसी

काठमाडौँ । नेपाली कांग्रेसले ‘एनसी फर एनसी’ नामको नयाँ अभियान सञ्चालन गर्ने भएको छ । ४४औं बीपी स्मृति दिवसको अवसरमा कांग्रेसले भदौ २४ गते सुरु हुने गरी नयाँ अभियान घोषणा गरेको हो ।

राष्ट्रिय सभागृहमा आयोजित समारोहमा सभापति गगनकुमार थापाले ‘एनसी फर एनसी अर्थात नेपाली कांग्रेस फर नेसनल कज’ अभियान घोषणा गरेका हुन् ।

Watch On

उनका अनुसार, यो अभियान एक वर्षसम्म सञ्चालन हुने छ ।

सभापति थापाले आजदेखि भदौ २४ गतेसम्म सबैले आफू सहभागी हुने र आफूले सञ्चालन गर्ने अभियानबारे सोच्ने र भदौ २४ गते बीपी जयन्तीका दिन प्रण गर्दै घोषणा गर्ने बताए ।

सभापति थापले भने – ‘यो अभियानको साझा उद्देश्य नागरिकको हितमा काम गर्ने हो । बीपी जयन्ती भव्य रुपमा मनाउँछौं । साउन ७ देखि भदौ २४ सम्म सोचौं । तयारी गरौं । यो बीचको अवधिमा सांगठनिक तयारी गर्छौं । भदौ २४ गते प्रण गर्ने हो, प्रतिज्ञा गर्ने हो ।’

यो अभियानमा कांग्रेसले ४ वटा क्लस्टरमा काम गर्ने छ ।

पहिलो– सदस्यहरुले रक्तदान, श्रमदान लगायत विषयमा प्रण गर्ने, दोस्रो– वैयक्तिक सहयोग अभियानमा सहभागी हुने, तेस्रो– नागरिक अभियानमा लाग्ने र चौथो– सुशासन अभियानमा लाग्ने गरी अभियान सञ्चालन गरिने सभापति थापाले जानकारी दिए ।

पार्टीलाई जीवित राख्न, जनविश्वास पुनर्स्थापित गर्न पनि यो अभियान सञ्चालन गर्नु परेको सभापति थापाले बताए ।