भारतीय अभियानी सोनम वाङ्चुकले २६ दिनमा तोडे अनसन

काठमाडौं । भारतीय चर्चित वातावरण तथा शिक्षा अभियानी सोनम वाङ्चुकले २६ दिनदेखि जारी राखेको भोक हड्ताल तोडेका छन् ।

सरकारसँगको छलफलपछि उनले आमरण अनसन टुंग्याएका हुन् । उनले सम्भावित हिंसा रोक्ने उद्देश्यसहित उनले अनसन तोडेको बताएका छन् । 

Watch On

भारतको राष्ट्रिय चिकित्सा प्रवेश परीक्षा (नीट)को प्रश्नपत्र चुहावट (पेपर लीक) प्रकरण र यसबाट उत्पन्न देशव्यापी शैक्षिक बेथितिप्रति आपत्ति जनाउँदै वाङ्चुक गत जुन २८ देखि आमरण अनसनमा बसेका थिए । 

कक्रोच जनता पार्टीलगायतका युवा समूहको नेतृत्वमा भइरहेको आन्दोलनलाई समर्थन गर्दै उनले परीक्षा प्रणालीमा व्यापक सुधार र यसको नैतिक जिम्मेवारी लिँदै शिक्षामन्त्री धर्मेन्द्र प्रधानको राजीनामा माग गरेका थिए । 

अनसनका क्रममा स्वास्थ्य गम्भीर रूपमा बिग्रिएपछि उनलाई नयाँ दिल्लीस्थित जन्तरमन्तरबाट प्रहरीद्वारा अस्पताल लगिएको थियो । सफदरजङ अस्पताल हुँदै उनको गुरुग्रामस्थित मेदान्ता अस्पतालमा विशेष निगरानीमा उपचार भइरहेको थियो ।

लामो समयको उपवासका कारण उनको तौलसमेत ११ किलोभन्दा बढी घटेको भारतीय समाचार माध्यमहरूले बताएका छन् ।
केन्द्र सरकारसँग दुई दिनसम्म चलेको कडा वार्तापछि लिखित आश्वासन प्राप्त भएपछि वाङ्चुकले बिहीबार मेदान्ता अस्पतालमा केन्द्रीय मन्त्रीद्वय जेपी नड्डा र डा. जितेन्द्र सिंहको उपस्थितिमा जुस पिएर २६औँ दिनमा अनसन तानेका हुन् ।

किन तोडे उनले अनसन?

जन्तरमन्तर र संसद् मार्चका क्रममा शान्तिपूर्ण प्रदर्शन गरेका विद्यार्थी तथा आन्दोलनकारीहरूमाथि कुनै पनि प्रकारको दण्डात्मक वा प्रतिशोधपूर्ण कानुनी मुद्दा नचलाउने सरकारले लिखित प्रतिबद्धता जनाएको छ ।

हाल चलिरहेको संसद्को बर्खे सत्रमा परीक्षा प्रणालीको गम्भीर अनियमितता, प्रश्नपत्र चुहावट र शैक्षिक सुधारका विषयमा व्यापक छलफल गर्ने सरकारले आश्वासन दिएको छ । 

नीट परीक्षाको प्रश्नपत्र लीक भएपछि तनावका कारण आत्महत्या गर्न बाध्य भएका विद्यार्थीका परिवारलाई उचित क्षतिपूर्ति उपलब्ध गराउने विषयमा सरकारले सकारात्मक ढङ्गले सोच्ने बताएको छ ।

देशमा थप सम्भावित झैझगडा र हिंसाको स्थिति नआओस् तथा शान्ति सुरक्षा कायम रहोस् भन्नका लागि पनि वार्ताबाटै समस्याको निकास खोजिएको उनले सामाजिक सञ्जालमार्फत बताएका छन् । विभिन्न राजनीतिक दलका करिब ६५ जना सांसदले समेत हस्ताक्षर गरी अनसन तोड्न आग्रह गरेका थिए । अनसन तोडसँगै वाङ्चुकले यसलाई भोकको अन्त्य र उत्तरदायित्वको सुरुवातको संज्ञा दिएका छन् । यद्यपि, आन्दोलनरत अन्य युवा समूहहरूले भने शिक्षामन्त्रीको राजीनामा नदिएसम्म आफ्ना अन्य शान्तिपूर्ण विरोधका कार्यक्रमहरू जारी रहने प्रस्ट्याएका छन् ।