मेलम्ची बन्द गरिएपछि तीन स्रोतबाट पूर्ति गर्दैछ केयुकेएलले पानी

काठमाडौं । उत्तरपश्चिमी सिन्धुपाल्चोकको मेलम्ची खोलाबाट ल्याइएको पानी बर्खाभरि बन्द गर्ने भएपछि काठमाडौं उपत्यका खानेपानी लिमिटेडले तीन स्रोतबाट माग धानिरहेको बताएको छ । केयुकेएलले सूचना जारी गर्दै वैकल्पिक स्रोतको रुपमा रिबर्मा खोला, सुन्दरीजल तथा डिप ट्युवेलबाट खानेपानीको आपूर्ति गरी वितरण भइरहेको बताएको हो ।

‘असार १९ गते देखि मेलम्चीबाट प्राप्त हुने पानीको आपूर्ति बन्द भएको सन्दर्भमा वैकल्पिक स्रोतको रुपमा रिबर्मा खोला, सुन्दरीजल तथा डिप ट्युवेलबाट खानेपानीको आपूर्ति गरी वितरण गर्ने कार्य भइरहेको र पानीको गुणस्तर कायम गर्नका लागि यथासम्भव प्रयास गरिएको छ,’ केयुकेएलले सूचना मार्फत भनेको छ ।

Watch On

तथापि वर्षायामको कारण कतिपय स्थानमा गुणस्तर कायम गर्न जटिलता समेत रहेकोले उमालेर मात्र पिउन पनि केयुकेएलले आग्रह गरेका छ ।

मेलम्ची खोलाबाट काठमाडौं पानी ल्याने गरिएकामा बाढीका कारण सुरूङ बन्द गरिएको छ । मेलम्ची नदीको पानी पथान्तरण रोकिएकाले आयोजनाले अम्बाथानस्थित सुरूङनजिकैको रिबर्मा खोलाबाट काठमाडौं पानी ल्याइरहेको छ ।

मेलम्ची नदीबाट दैनिक १७ करोड लिटर पानी ल्याइने गरेकामा बन्द भएपछि तीन विकल्पबाट माग धान्न कठिन भइरहेको केयुकेएलले बताएको छ । विगतमा शिवपुरीमा बनाइएको धाप ड्याम खोलेर पनि उपत्यकाको माग धानिएको थियो ।