नागढुंगा सुरूङ उद्‍घाटन साउन ११ गते

काठमाडौं । नागढुंगा सुरूङमार्गको उद्‍घाटन आगामी साउन ११ गते गरिने भएको छ । सडक विभागका प्रवक्ता शुभराज न्यौपानेका अनुसार आगामी सोमबार सुरूङको उद्घाटन हुनेछ। तर कसले उद्घाटन गर्ने यकिन नभइसकेको उनले बताए ।

‘पूर्वाधार मन्त्रीज्यू नै सहभागी हुनुहुन्छ कि मन्त्रालयका सचिवज्यूले उद्घाटन गर्ने यकिन भइसकेको छैन,’ उनले भने ।

Watch On

उद्घाटनका अवधिमा जापानिज सहयोग नियोग (जाइका) अध्यक्ष, नेपालका लागि जापानका राजदूत लगायतको उपस्थिति रहनेछ ।

नेपालको पहिलो आधुनिक सुरुङमार्गका रूपमा निर्माण गरिएको नागढुंगा–सिस्नेखोला सुरुङमार्ग सञ्चालनका लागि सम्पूर्ण भौतिक पूर्वाधार निर्माण तथा व्यवस्थापकीय तयारीहरू अन्तिम चरणमा पुगेको आयोजनाले जनाएको छ । उद्घाटनपछि केही सवारी गुडेता पनि पूर्ण रूपमा भने सञ्चालन आउने छैन । टोल लगायत केही काम बाँकी रहेको न्यौपानेले बताए ।

सुरुङमार्गको सञ्चालन, व्यवस्थापन र मर्मतसम्भारका लागि अन्तर्राष्ट्रिय तथा राष्ट्रिय बोलपत्र आह्वान गरिएको थियो। प्रतिस्पर्धात्मक प्रक्रियामार्फत चिनियाँ तथा नेपाली संयुक्त कम्पनी छनोट भएको छ।  सुरुङमार्ग सञ्चालनमा आएपछि सुरुको अवधिमा सुरक्षा र प्राविधिक पक्षको मूल्याङ्कन गर्न ३ महिनासम्म परीक्षणकाल रहने बताइएको छ ।

चिपमा आधारित प्रविधि तथा डिजिटल प्रणालीबाट सवारी साधनको शुल्क संकलन गरिने आयोजनाले जनाएको छ । नेपाल राष्ट्र बैंकको भुक्तानी प्रणाली विभागले यसका लागि बैंकमार्फत प्रि–पेड ट्याग वा कार्ड जारी गर्ने अनुमति समेत दिइसकेको छ।  सवारी साधनको प्रकृति र आकार हेरी मन्त्रिपरिषद्को निर्णयअनुसार ५० रुपैयाँदेखि ६०० रुपैयाँसम्म टोल शुल्क तिर्नुपर्ने व्यवस्था गरिएको छ। संकलित राजस्व नेपाल सडक बोर्डको खातामा जम्मा हुनेछ।  

मुख्य सुरुङमार्ग २.६८ किलोमिटर लामो छ भने आकस्मिक उद्धारका लागि २.५५ किलोमिटरको छुट्टै ‘इभक्वेसन टनेल’ (आपतकालीन सुरुङ) बनाइएको छ । सुरुङभित्र आगलागी वा अन्य दुर्घटनाबाट बच्न अत्याधुनिक सीसी क्यामेरा, भेन्टिलेसन फ्यान, अग्नि नियन्त्रक यन्त्र (फायर हाइड्रेन्ट) तथा अलार्म जडान गरिएको छ।