रौतहटका सांसद गणेश पौडेललाई दुर्व्यवहार गरिएको भन्दै रास्वपाले गर्‍यो भर्त्सना

काठमाडौं । रौतहट निर्वाचन क्षेत्र नम्बर ४ बाट निर्वाचित राष्ट्रिय स्वतन्त्र पार्टीका प्रतिनिधिसभा सदस्य गणेश पौडेलमाथि दुर्व्यवहार भएको भन्दै पार्टीले भर्त्सना गरेको छ ।

गत साउन ७ गते जनतासँगको भेटघाट कार्यक्रम सम्पन्न गरी फर्कने क्रममा पौडेलमाथि कालो मसी प्रहार गरिएको रास्वपाले बताएको  छ ।
‘दुर्व्यवहारको घटनाप्रति राष्ट्रिय स्वतन्त्र पार्टी संसदीय दलको गम्भीर ध्यानाकर्षण भएको छ । यस प्रकारको हिंसात्मक तथा अमर्यादित गतिविधिको संसदीय दल घोर भर्त्सना गर्दछ । लोकतान्त्रिक व्यवस्थामा असहमति र विरोध व्यक्त गर्ने अधिकार सुरक्षित छ । तथापि जनप्रतिनिधिमाथि हुने हिंसा, दुर्व्यवहार वा अपमानजनक व्यवहार कुनै पनि लोकतान्त्रिक समाजमा स्वीकार्य हुन सक्दैन । यस्ता गतिविधिले विधिको शासन, लोकतान्त्रिक संस्कार र शान्तिपूर्ण–सुसंस्कृत राजनीतिक अभ्यासमाथि प्रहार गर्दछ,’ मुख्य सचेतक कविन्द्र बुर्लाकोटीले विज्ञप्तिमार्फत भनेका छन् ।

Watch On

यस घटनाको निष्पक्ष अनुसन्धान गरी घटनामा संलग्न व्यक्तिहरूमाथि कानूनबमोजिम कडा कारवाही गर्न, घटनाको सत्यतथ्य सार्वजनिक गर्न तथा भविष्यमा यस्ता घटना दोहोरिन नदिने गरी जनप्रतिनिधिहरूको सुरक्षा सुनिश्चित गर्न राष्ट्रिय स्वतन्त्र पार्टीले संसदीय दल नेपाल सरकार र सम्बन्धित निकायसँग जोडदार माग गरेको छ ।