परीक्षा धाँधली र तीव्र आन्दोलनकाबीच भारतीय शिक्षामन्त्री धर्मेन्द्र प्रधानद्वारा राजीनामा

काठमाडौँ । भारतका केन्द्रीय शिक्षा मन्त्री धर्मेन्द्र प्रधानले आफ्नो पदबाट राजीनामा दिएका छन्‌। मेडिकल प्रवेश परीक्षा (नीट)को प्रश्नपत्र चुहावट र परीक्षामा भएका अन्य अनियमिततालाई लिएर देशव्यापी रूपमा चर्किएको विद्यार्थी आन्दोलन र चौतर्फी दबाबपछि उनले शनिबार प्रधानमन्त्री नरेन्द्र मोदीलाई आफ्नो राजीनामा पत्र बुझाएको भारतीय समाचार संस्थाहरूले बताएका छन् ।

राजीनामा दिएलगत्तै सामाजिक सञ्जाल एक्समा एक पत्र सार्वजनिक गर्दै धर्मेन्द्र प्रधानले यो निर्णय आफ्नो व्यक्तिगत प्रतिष्ठाको विषय नभएको उल्लेख गरेका छन् । उनले देशको युवा शक्ति नै राष्ट्रको वास्तविक सामर्थ्य भएको भन्दै विद्यार्थीहरूलाई अन्योलको जालमा फस्न नदिन आफूले पद त्यागेको बताए ।

Watch On

प्रधानले आफ्नो पत्रमा लेखेका छन्, 'जन्तरमन्तर र देशभरिको परिस्थितिलाई ध्यानमा राख्दै—कुनै पनि राष्ट्रविरोधी तत्वले यसको गलत फाइदा उठाउन नपाओस्, राष्ट्रिय एकता कायम रहोस् र हाम्रा बालबालिकाहरू कानुनी जटिलतामा नफसी आफ्नो पढाइ र करियरमा ध्यान केन्द्रित गर्न सकून् भन्ने उद्देश्यले मैले माननीय प्रधानमन्त्रीज्यूसमक्ष राजीनामा बुझाएको छु ।'

भारतमा परीक्षा प्रणालीमा सुधार र जबाफदेहिताको माग गर्दै युवा तथा विद्यार्थीहरूले ककरोच जनता पार्टीको ब्यानरमा हप्तौंदेखि विशाल आन्दोलन चलाइरहेका थिए । सरकार र आन्दोलनकारीका प्रतिनिधिहरूबीच दोस्रो चरणको वार्ता हुनुभन्दा ठीक केही घण्टाअघि यो राजीनामा आएको हो । आन्दोलनकारीहरूले शिक्षा मन्त्रीको राजीनामालाई नै मुख्य 'बटमलाइन' बनाएर नयाँ दिल्लीको जन्तरमन्तरमा लामो समयदेखि धर्ना दिइरहेका थिए ।

प्रश्नपत्र चुहावटका कारण सिर्जित तनाव र कतिपय विद्यार्थीहरूले आत्महत्यासमेत गरेको घटनाले यो आन्दोलनलाई थप उग्र बनाएको थियो । विपक्षी दलहरूले पनि लगातार संसद् र सडकमा सरकारको आलोचना गर्दै आएका थिए।

शिक्षा मन्त्रीको राजीनामा आए तापनि आन्दोलनकारी समूहले परीक्षा प्रणालीमा पूर्ण सुधार र दोषीहरूमाथि कडा कारबाहीको माग गर्दै आइतबार साँझ देशव्यापी रूपमा 'क्यान्डल मार्च' (मैनबत्ती जुलुस) गर्ने घोषणा गरेको छ।अर्कोतर्फ, प्रधानमन्त्री नरेन्द्र मोदी नेतृत्वको सरकारले परीक्षामा हुने धाँधली र प्रश्नपत्र चुहावट रोक्नका लागि कडा कानुन ल्याउने तयारी गरिरहेको भारतीय समाचारमा उल्लेख छ ।