मुख्य समाचार

तीनथानामा स्कुटर र मिनी ट्रक ठोक्किँदा २ जनाको मृत्यु

सिधाकुरा

सोमबार, साउन ११, २०८३

तीनथानामा स्कुटर र मिनी ट्रक ठोक्किँदा २ जनाको मृत्यु

काठमाडौँ । काठमाडौं चन्द्रागिरि नगरपालिका–१५ तीनथानास्थित सडकखण्डमा सोमबार बिहान स्कुटर र मिनी ट्रक एक आपसमा ठोक्किँदा स्कुटरमा सवार दुई जनाको मृत्यु भएको छ ।

सोमबार बिहान २ः५८ बजे सतुंगलबाट कलंकीतर्फ आउँदै गरेको बा.प्र.०२–०३८ प ९८९७ नम्बरको स्कुटर र सोही दिशातर्फ आउँदै गरेको लु १ क ४२५६ नम्बरको मिनी ट्रक एकआपसमा ठोक्किँदा दुर्घटना भएको हो ।

Watch On

दुर्घटनामा घाइते भएका स्कुटर चालक र पछाडि सवार महिलालाई तत्काल उद्धार गरी कलंकीस्थित शहीद मेमोरियल अस्पताल पुर्‍याइएको थियो । दुवैको अवस्था गम्भीर भएपछि थप उपचारका लागि बीएण्डबी अस्पताल, ग्वार्को, ललितपुर रिफर गरिएको थियो ।

दुर्घटनामा काठमाडौंको चन्द्रागिरि नगरपालिका–१२ हरियाली बस्ने ४० वर्षीय दीपक नेपालको उपचारका क्रममा चिकित्सकले उनलाई मृत घोषणा गरेका हुन् ।

यस्तै, स्कुटरको पछाडि सवार काठमाडौंको चन्द्रागिरि नगरपालिका–१४ बस्ने ५६ वर्षीया शुभद्राकुमारी नेपाललाई बिहान ०७ः०५ बजे चिकित्सकले मृत घोषणा गरेका हुन् ।

दुर्घटनापछि स्कुटर ट्राफिक प्रहरी प्रभाग कलंकीको नियन्त्रणमा रहेको छ भने मिनी ट्रक र चालकलाई प्रहरी वृत्त थानकोटले नियन्त्रणमा लिएको छ ।

दुर्घटनाको कारणबारे थप अनुसन्धान भइरहेको छ ।

प्रकाशित मिति: सोमबार, साउन ११, २०८३

प्रतिक्रिया दिनुहोस्