वैशाखयता सर्पले टोकेर मात्रै ५३ को ज्यान गयो

काठमाडौँ । वैशाख लागेयता सर्पले टोकेर मात्रै देशभरमा ५३ जनाको मृत्यु भएको छ । ५ सय ८९ जना घाइते भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको २०८३ वैशाख १ गतेदेखि साउन ११ गते (आज) सम्मको विपद्का प्रमुख घटना र क्षति विवरण अनुसार यो अवधिमा समग्र विपद्का घटनामा परी १ सय ८९ जनाको मृत्यु भएको छ ।

Watch On

प्राधिकरणका अनुसार, यो अवधिमा सर्पदंशका कुल ६ सय ३७ घटना भएका छन् ।

त्यसैगरी चट्याङ लागेर २५ जनाको मृत्यु भएको छ भने १ सय ३२ जना घाइते भएका छन् । लेक लागेर २१ जनाको मृत्यु हुँदा ३७ जना घाइते भएका छन् भने आगलागीबाट १९ जनाको मृत्यु भएको छ भने १ सय २६ जना घाइते भएका छन् ।

जनावरको आक्रमणबाट १७ को मृत्यु भएको छ भने ११७ जना घाइते भएका छन् । त्यसैगरी यसबीचमा पहिरोका ६३३ घटना हुँदा १७ जनाको मृत्यु भएको छ भने १ जना बेपत्ता छन् । २५ जना घाइते भएका छन् । बाढीका कारण १४ जनाको मृत्यु हुँदा २ जना बेपत्ता छन्, १० जना घाइते भएका छन् । हवाहुरीका कारण २४ जनाको मृत्यु भएको ६८ जना घाएका छन् ।

भारी वर्षाकै कारण ४ जना, डुंगा पल्टेर २ जना, डढेलोबाट १ जना, हिउँ पहिरोबाट १ जना विस्फोटनबाट १ जना र अन्य घटनाबाट १ जनाको मृत्यु भएका प्राधिकरणले जनाएको छ ।

समग्रमा यसबीचमा भएका ३ हजार ८ सय ३६ विपद्का घटनामा १ सय ८९ जनाको मृत्यु हुँदा १ हजार १ सय १८ जना घाइते भएका छन् । पछिल्ला २४ घटनामा विपद्का विभिन्न ५८ घटना हुँदा २ जनाको मृत्यु भएको पनि बिबरणमा उल्लेख छ ।