सुनसरी घटनाः सबै स्थानीय सुरक्षा प्रमुख तानिए, नयाँ खटाइए

काठमाडौँ । सुनसरीको घटनालाई लिएर सरकारले सुनसरीका सुरक्षा प्रमुखदेखि कोशी प्रदेशका डीआईजीसम्मलाई काठमाडौँ तानेको छ।

गृह मन्त्रालयले सुनसरीका प्रमुख जिल्ला अधिकारी बासुदेव घिमिरेलाई  मन्त्रालयमा तानेर उनको ठाउँमा संखुवासभाका सीडीओ ईश्वरीप्रसाद अर्याललाई खटाएको छ ।

Watch On

कोशी प्रदेश प्रहरी कार्यालयका प्रमुख, डीआईजी विनोद घिमिरे प्रहरी प्रधान कार्यालय तानिएका छन् भने प्रहरी प्रधान कार्यालयमा कार्यरत डीआईजी शेखर खनाललाई कोशी प्रदेश प्रहरी कार्यालय पठाइएको छ।

त्यस्तै सुनसरीका प्रहरी प्रमुख एसपी केशव थेवेलाई भैरहवास्थित गौतमबुद्ध अन्तर्राष्ट्रिय विमानस्थल खटाएर उनको ठाउँमा विमानस्थलमा कार्यरत एसपी पुष्पराज मल्ललाई खटाइएको छ ।

सशस्त्र प्रहरी बल नेपाल कप्तानगञ्जमा कार्यरत डीएसपी नन्दकिशोर महतोलाई पनि फिर्ता बोलाइएको छ । उनको ठाउँमा सशस्त्र प्रहरी बल नेपाल प्रधान कार्यालय, काठमाडौँबाट डीएसपी मदन नाथलाई पठाइएको छ ।

सुनसरीको कप्तानगञ्जमा गएराति दुई समूहबीच भएको झडपमा एक जनाको मृत्यु भएको थियो। कप्तानगञ्ज गएरातिदेखि नै अशान्त छ ।

कर्फ्यु लगाउँदा पनि प्रदर्शन नरोकिएपछि दिउँसोदेखि सेना परिचालन गरिएको छ।

गृह मन्त्रालयले घटनाको छानबिन गर्न सहसचिव भुपेन्द्र थापाको संयोजकत्वमा ५ सदस्यीय समिति गठन पनि गरिसकेको छ।