एमालेले भन्यो– सरकार सुनसरी घटनामा उदासीन र दिशाहीन देखियो

काठमाडौं । नेकपा एमालेले सुनसरीको देवानगञ्ज गाउँपालिकामा विगत दुई दिनदेखि उत्पन्न तनावग्रस्त परिस्थिति समाधान गर्न सरकार उदासीन र दिशाहीन देखिएको आरोप लगाएको छ । मंगलबार विज्ञप्ति जारी गर्दै विवाद समाधानका लागि समयमै सार्थक संवाद र समन्वयको पहल गर्नुको सट्टा राज्य संयन्त्रबाट अनावश्यक बल प्रयोग गर्ने, तुजुक देखाउने र त्रासको वातावरण सिर्जना गर्ने कार्यले परिस्थितिलाई थप उत्तेजित बनाएको एमालेको विश्लेषण छ ।

‘नागरिकको जिउधनको सुरक्षा गर्ने र मुलुकमा शान्ति–सुरक्षा कायम गर्ने प्राथमिक जिम्मेवारी बोकेको सरकार तथा स्थानीय प्रशासन यति संवेदनशील विषयमा चरम गैरजिम्मेवार, उदासीन र दिशाहीन देखिनु अत्यन्तै भर्त्सनायोग्य विषय हो । विवाद समाधानका लागि समयमै सार्थक संवाद र समन्वयको पहल गर्नुको सट्टा राज्य संयन्त्रबाट अनावश्यक बल प्रयोग गर्ने, तुजुक देखाउने र त्रासको वातावरण सिर्जना गर्ने कार्यले परिस्थितिलाई थप उत्तेजित बनाएको  छ,’ एमाले महासचिव शंकर पोखरेल विज्ञप्तिमार्फत भनेका छन् ।

Watch On

 सुनसरी जिल्लाको देवानगञ्ज गाउँपालिकामा विगत दुई दिनदेखि उत्पन्न तनावग्रस्त परिस्थिति र त्यस क्रममा राज्य पक्षबाट भएको अत्यधिक बल प्रयोगका कारण स्थानीय युवा ओमप्रकाश मेहताको गोली लागेर भएको दुःखद निधन तथा अन्य नागरिकहरू गम्भीर घाइते भएको घटनाप्रति नेपाल कम्युनिष्ट पार्टी (एमाले) को गम्भीर ध्यानाकर्षण भएको छ । नागरिकको जिउधनको सुरक्षा गर्ने र मुलुकमा शान्ति–सुरक्षा कायम गर्ने प्राथमिक जिम्मेवारी बोकेको सरकार तथा स्थानीय प्रशासन यति संवेदनशील विषयमा चरम गैरजिम्मेवार, उदासीन र दिशाहीन देखिनु अत्यन्तै भर्त्सनाको  विषय हो । विवाद समाधानका लागि समयमै सार्थक संवाद र समन्वयको पहल गर्नुको सट्टा राज्य संयन्त्रबाट अनावश्यक बल प्रयोग गर्ने, तुजुक देखाउने र त्रासको वातावरण सिर्जना गर्ने कार्यले परिस्थितिलाई थप उत्तेजित बनाएको  छ । 
एमालेले सुनसरी घटनामा मारिएका युवा ओमप्रकाश मेहताप्रति एमालेले दुःख व्यक्त गरेको छ । घटनामा परी घाइते भएका सम्पूर्ण नागरिकहरूको अविलम्ब, प्रभावकारी र पूर्ण निःशुल्क उपचारको व्यवस्था मिलाउन, पीडित परिवारलाई उचित राहत एवं क्षतिपूर्ति प्रदान गर्न तथा घटनाको निष्पक्ष र उच्चस्तरीय छानबिन गरी दोषीमाथि कडा कानुनी कारबाही सरकारसँग माग गरेको छ । 

‘राज्यलाई आफ्नो दमनकारी रवैया तत्काल रोकेर संयमताका साथ समस्याको दीर्घकालीन र शान्तिपूर्ण समाधान खोज्न आग्रह गर्दछ । मुलुकको राष्ट्रिय एकता, भाइचारा र सामाजिक सद्भाव नै हाम्रो मुख्य सामर्थ्य  हो । अतः यस विषम र संवेदनशील घडीमा देवानगञ्ज र सिङ्गो सुनसरी क्षेत्रका सम्पूर्ण दाजुभाइ तथा दिदीबहिनीहरूमा कुनै पनि प्रकारको अफवाहमा नलागी वर्षौंदेखि कायम रहँदै आएको धार्मिक, सामाजिक र जातीय सद्भाव, आपसी एकता लाई अक्षुण्ण राख्न नेपाल कम्युनिष्ट पार्टी (एमाले) हार्दिक आह्वान गर्दछ,’ एमालेले भनेको छ ।