रविमार्फत प्रधानमन्त्रीलाई गगनका पाँच सुझाव

काठमाडौँ । नेपाली कांग्रेसका सभापति गगनकुमार थापाले सुनसरी घटनापछि उत्पन्न परिस्थितिमा प्रधानमन्त्री बालेन्द्र शाहलाई पाँचवटा सुझाव दिएका छन् ।

रास्वपा सभापति रबि लामिछानेले बोलाएको सर्वदलीय बैठकमा सहभागी हुँदै कांग्रेस सभापति थापाले सम्वादहरु बढाउन प्रधानमन्त्रीलाई सुझाएका हुन् । 

Watch On

थापाले रास्वपा सभापतिमार्फत प्रधानमन्त्री शाहलाई ती सुझावहरु दिएका हुन् । 

थापाले पहिलोमा सुनसरी घटनापछि प्रधानमन्त्रीले अभिभावक र लिडरको रुपमा तत्कालै सर्वदलीय बैठक बोलाउनुपर्ने सुझाएका छन् । 

दोस्रोमा राष्ट्रपति रामचन्द्र पौडेलसँग भेट्न सुझाएका छन् । 

तेस्रोमा प्रदेशको सरकारसँग सम्वाद गर्न सुझाएका छन् । 

चौथोमा स्थानीय सरकारसँग सम्पर्क गरेर सहकार्य गर्न भनेका छन् । 

पाँचौमा आफूले गरेका प्रयासबारे तत्कालै जनतालाई बताएर सबैबाट साझा प्रयासका लागि आधार निर्माण गर्न भनेका छन् ।

थापाले यो बेलामा स्टाटसमा सीमित नहुन, भाउ खाएर नबस्न प्रधानमन्त्रीलाई सुझाउँदै सबैलाई जोड्ने प्रयास गर्न अपिलसमेत गरेका छन् । 

बैठकपछि गगनले भने, 
सरकार कहाँ छ, के गर्दैछ ? सरकार केवल बन्दुकको गोली र लाठीमा मात्र भेटिनु हुँदैन । र सरकार स्टाटसमा मात्र सीमित रहनु हुँदैन । सरकार भनेको अभिभावक मात्र होइन लिडर हो । लिडरको सबैभन्दा ठूलो स्ट्रेन्थ भनेको उसले कोलाबरेट गर्न सक्नुपर्छ । उसले अरुलाई विश्वास गर्न सक्नुपर्छ । अरुले पनि विश्वास गर्नुपर्छ । यतिबेला हामीले अपेक्षा गर्ने भनेको प्रधानमन्त्रीले तत्कालै सर्वदलीय बैठक बोलाउने हो । प्रधानमन्त्रीले राष्ट्रपति भेट्ने हो । प्रदेशको सरकारसँग सम्वाद गर्ने हो । तल त्यत्रा स्थानीय सरकार छ, उनीहरुसँग सम्वाद गर्ने हो । तत्कालै आफूले गरेका प्रयासबारे बताउने र सँगसँगै सबैबाट साझा प्रयासका लागि आधार निर्माण गर्ने हो । भूकम्प र कोभिडको बेला राजनीतिक तनाव थियो । तर सबै कुरा छोडेर जुट्यौं । हाम्रो यो राजनीतिक कल्चर हो । सुनसरीमा जुन घटना भयो, यो राज्यको असफलताको चक्र हो । किन यस्तो भयो, छानबिन गर्छौं । प्रहरीलाई दोष दिएर हुँदैन । हामी यो बेला सरकारलाई अफ्ठेरो पार्न चाहँदैनौं । साथमै छौं । तर यस्तो बेलामा प्रधानमन्त्री भाउ खाएर बस्ने ? ठालु भएर बस्ने ? रिचआउँट गर्नुपर्दैन ? जोड्ने प्रयास गर्नुपर्दैन ? गर्नुस् भन्ने माग हो । सभापतिमार्फत प्रधानमन्त्रीसमक्ष कुरा राखेका छौं । सामाजिक सद्भाव र धार्मिक सहिष्णुताको निम्ति सबै पहल गर्छौं ।