यी हुन रास्वपा केन्द्रीय समितिका ११ निर्णय

काठमाडौं । राष्ट्रिय स्वतन्त्र पार्टीको बुधबार बसेको केन्द्रीय समितिको बैठकले ११ वटा निर्णय गरेको छ ।

पार्टी केन्द्रीय कार्यालय चःमतिमा बसेको बैठकले सुनसरी लगायतका जिल्लाका पछिल्ला घटनाक्रमहरूमा परी ज्यान गुमाउनुहुने नागरिकप्रति श्रद्धाञ्जलि व्यक्त गरेको छ । घटनामा परी घाइते भएका सम्पूर्ण नागरिक तथा सुरक्षाकर्मीहरूको शीघ्र स्वास्थ्य लाभको कामना गरेको छ ।

Watch On

बैठकले पार्टीको वडा तहदेखि केन्द्रसम्म भएको प्रथम ऐतिहासिक महाधिवेशनका बहुआयामिक पक्षहरूमा विस्तृत र निर्मम समीक्षा गरिएको महामन्त्री विपिन आचार्यले जानकारी दिए । उनले लोकतान्त्रिक अभ्यासका क्रममा हरेक तहमा भएका कमी–कमजोरीहरूलाई निसङ्कोच स्वीकार गर्दै, ती अनुभवहरूबाट पाठ सिकेर सिङ्गो पार्टी पङ्क्तिलाई थप परिपक्व र सुदृढ बनाउन सम्पूर्ण प्रक्रियाको बृहत अध्ययन गर्ने निर्णय गरिएको बताएका छन् ।

तेस्रो निर्णयमा पार्टी विधानको भाग ६ को धारा २३ बमोजिम ‘पार्टी सचिवालय’ गठन गरिएको उनले बताएका छन् । उक्त सचिवालयमा पार्टी सभापतिसहित निर्वाचित पदाधिकारीहरु उपसभापतिद्वय डा. स्वर्णिम वाग्ले र सोबिता गौतम, महामन्त्री विपिन कुमार आचार्य तथा सह–महामन्त्रीत्रय असिम शाह, हरि ढकाल र निशा डाँगी रहेको आचार्यले बताए ।

चौथो निर्णयमा वरिष्ठ नेतामा बालेन शाहलाई मनोनीत गरेको छ । पार्टी विधानको भाग ६ को धारा २२ को उपधारा ११ (ञ) को बमोजिम पार्टी सभापति रवि लामिछानेको प्रस्तावमा बालेन शाहलाई सर्वसम्मत रूपमा पार्टीको वरिष्ठ नेता मनोनित गरिएको छ आचार्यले बताए ।

आगामी श्रावण १८ गते साँझ ५ बजेसम्म केन्द्रीय समिति सदस्यहरूबाट प्राप्त हुने संशोधन सुझावहरूलाई समेट्ने गरी कार्यविधि र दस्तावेजहरु पारित गरिएको आचार्यको भनाइ छ । जसमा बैठक सञ्चालन कार्यविधि, २०८३, सदस्यता सम्बन्धी कार्यविधि, २०८३, सदस्यता अद्यावधिक तथा जिम्मेवारी बाँडफाँट, २०८३, विभाग सम्बन्धी कार्यविधि, २०८३ छन् ।

छैटौ निर्णयमा विभागीय नेतृत्व छनोटमा कार्ययोजना माग गरेको उनले बताए । जसअन्तर्गत विभागको नेतृत्व गर्न इच्छुक केन्द्रीय सदस्य तथा प्रतिनिधि सभा सदस्यहरूबाट आफूले नेतृत्व गर्न चाहेको विभागको स्पष्ट लक्ष्य र रूपरेखासहितको ६ महिने कार्ययोजना माग गरिएको उनले बताए ।

सातौं निर्णयमा मन्त्रीहरूसँग प्रत्यक्ष संवाद गर्ने निर्णय भएको छ । सरकारमा सहभागी पार्टीका मन्त्रीहरूको कार्यसम्पादनलाई जनमुखी बनाउन र पार्टीसँगको समन्वयलाई प्रभावकारी बनाउन, महिनाको कम्तीमा एक दिन मन्त्रीहरूसँग पार्टी कार्यालयमा केन्द्रीय समिति सदस्यहरूको उपस्थितिमा समसामयिक र बहुआयामिक विषयमा अनिवार्य छलफल गर्ने निर्णय गरिएको आचार्यको भनाइ छ ।

आठौं निर्णयमा क्यान्डिडेट क्लब घोषणा छ । आगामी स्थानीय तहको निर्वाचनमा योग्य, इमानदार र सक्षम उम्मेदवारहरू छनोट गर्ने प्रक्रियाको पहिलो बिन्दुका रूपमा  आगामी भदौ १ गतेदेखि क्यान्डिडेट क्लब का लागि  आवेदन खुल्ला गर्ने निर्णय गरिएको उनले बताए ।

नवौं निर्णयमा. अन्तर्राष्ट्रिय युवा दिवस मनाउने छ ।

पार्टीले अन्तर्राष्ट्रिय युवा दिवस २०२६ लाई युवा जागरण र रूपान्तरणको उत्सवका रूपमा भव्यताका साथ मनाउने निर्णय गरेको उनले बताए । यस कार्यक्रमको आयोजक समितिको संयोजकको जिम्मेवारी केन्द्रीय सदस्य एवं पार्टीका पूर्वमहामन्त्री कविन्द्र बुर्लाकोटीलाई प्रदान गरिएको पनि उनले बताए ।

दसौं निर्णयमा नागरिकका समस्या र गुनासोलाई प्रत्यक्ष रूपमा सुन्न र समाधानका लागि आवश्यक सहजीकरण गर्न हरेक तहका पार्टी कार्यालयहरूमा अनिवार्य उपस्थिति रहने संयन्त्र निर्माण गर्ने निर्देश गरिएको छ । जसअनुसार पहिलो चरणमा नागरिकको सेवाका लागि केन्द्रीय कार्यालयमा हरेक दिन दुईजना केन्द्रीय सदस्य, प्रदेश कार्यालयमा दुईजना प्रदेश सदस्य र जिल्ला कार्यालयमा एकजना जिल्ला समिति सदस्यको उपस्थिति अनिवार्य गरिएको महामन्त्री आचार्यले बताए ।

यस्तै एघारौं निर्णयमा सामाजिक संवेदनशीलतालाई गम्भीर रूपमा मनन गर्दै, पार्टीको हरेक तह र तप्कामा रहेका सदस्यहरूलाई आत्महत्या र आत्मदाह जस्ता अत्यन्तै दुःखद घटना, समाचार वा जानकारीहरू आफ्ना कुनै पनि सामाजिक सञ्जालहरूमा सेयर वा सम्प्रेषण नगर्न केन्द्रीय समितिले निर्देशन जारी आचार्यले बताए ।