प्रधानमन्त्रीलाई प्रचण्डको सुझाव– संसद्‍मै स्पष्टीकरण दिनुस्, संवाद बढाउनुस्

काठमाडौं । नेपाली कम्युनिस्ट पार्टीका संयोजक तथा सांसद पुष्पकमल दाहाल ‘प्रचण्ड’ ले प्रधानमन्त्री बालेन शाहलाई संसदमा उठेका विवादबारे स्पष्टीकरण दिन र प्रतिपक्षीसँग संवाद बढाउन आग्रह गरेका छन् ।

बिहीबार प्रतिनिधिसभा बैठकमा बोल्दै उनले प्रधानमन्त्रीका केही अभिव्यक्तिका कारण असहज अवस्था बनेको भन्दै लोकतान्त्रिक अभ्यासअनुसार संसदमै स्पष्ट पार्नुपर्ने बताए ।

Watch On

‘असहज बनाउने अभिव्यक्ति भए प्रधानमन्त्रीले संसदमै स्पष्टीकरण दिनुपर्छ,’ उनले भने ।

प्रचण्डले स्पष्टीकरण दिनुले प्रधानमन्त्रीको कद घट्ने नभई झन् बढ्ने जिकिर गरे । प्रतिपक्षीसँग संवाद गर्नु पनि लोकतान्त्रिक संस्कृतिको हिस्सा भएको उनको भनाइ थियो ।

उनले जेठ १७ गते संसदमा प्रधानमन्त्रीले ‘नेपालले पनि भारतको जग्गा मिचेको रहेछ’ भन्ने अभिव्यक्ति दिएको प्रसंग उल्लेख गर्दै त्यसबारे उठेका प्रश्नको जवाफ दिन आग्रह गरे ।

प्रचण्डले देशलाई सही दिशामा लैजाने जिम्मेवारी सरकार र सत्तारुढ राष्ट्रिय स्वतन्त्र पार्टीकै काँधमा रहेको बताए ।

‘देशलाई कता लैजाने भन्ने जिम्मेवारी सरकारकै हातमा छ,’ उनले भने ।

उनले प्रधानमन्त्रीले अनुभवी राजनीतिक नेतृत्व, विज्ञ र बुद्धिजीवीसँग पनि संवाद गर्नुपर्ने धारणा राखे । विगतका अनुभवबाट सिक्ने र सहकार्य गर्ने अवसर हुँदाहुँदै त्यसबाट टाढा रहनु उचित नहुने उनको भनाइ थियो ।

‘अनुभवी व्यक्तिहरूसँग संवाद गर्न के ले रोकेको हो ?’ उनले प्रश्न गरे ।

प्रचण्डले आफूलाई समेत बोलाएर भ्रष्टाचारविरुद्धको अभियानका अनुभवबारे छलफल गर्न सकिने उल्लेख गर्दै अहंकारका कारण संवादबाट टाढा बस्नु दुर्भाग्यपूर्ण हुने चेतावनी दिए ।