धर्मको नाममा हुने समस्यालाई जरादेखि समाधान गर्छौं : गृहमन्त्री गुरुङ

काठमाडौँ । गृहमन्त्री सुधन गुरुङले धर्मको नाममा हुने समस्यालाई जरादेखि नै समाधान गरिने बताएका छन् । 

सुनसरीमा सञ्चारकर्मीसँग कुरा गर्दै मन्त्री गुरुङले धर्मका नाममा यो तहको द्वन्द्वको सिर्जना यसअघि कहिले नभएको भन्दै राज्य संयन्त्रले सुक्ष्म अनुसन्धान गरिरहेको र जरोसम्म पुगेर दिर्घकालीन समाधान खोजिने बताए ।  

Watch On

'नेपालमा धर्मको नाममा कहिले पनि द्वन्द्व भएको छैन । अब पनि हुनुहुँदैन । यसअघि यो तहको द्वन्द्व सिर्जना भएको थिएन । भएका घटनाको पनि यसअघि निष्पक्ष छानबिन भएको थिएन । अहिले आशा छ नागरिकको । हाम्रो तर्फबाट नागरिकलाई निराश बनाउँदैनौं । यसलाई जरादेखि समाधान गर्नुपर्नेछ । त्यसमा हामी काम गरिरहेका छौं,' उनले भने । 

गृहमन्त्री गुरुङले सुनसरीमा शान्ति सुरक्षा कायम गर्न दुई हजार बढी सुरक्षाकर्मी परिचालन गरिएको, प्रहरी, सशस्त्र र नेपाली सेना खटिएको बताए ।

उनले आफू पहिलो दिनदेखि नै शान्ति सुरक्षा कायम गराउन सक्रिय भएको बताए । घटनालगत्तै छानबिन समिति बनाएर पठाएको, प्रश्न उठेपछि समितिमा हेरफेर गरेको र सदस्य थपेर पठाएको, घाइतेको उपचारका लागि स्वास्थ्यमन्त्री खटाएको उल्लेख गर्दै मन्त्री गुरुङले निष्पक्ष छानबिन हुने बताए । छानबिनबाट दोषीमाथि कडा कारवाही हुने र घटना दोहरिन नदिन सबै प्रकारको रणनीति अपनाइने उनले बताए । 

मन्त्री गुरुङले सुनसरी घटनालाई गम्भीरतापूर्वक लिएर समाधान गर्न लागेको र रणनीति बनाउनुपर्ने भएकाले केही ढिलोगरी निरीक्षणमा आएको बताए । 'अर्को ठाउँमा चर्किएला भनेर पूर्वतयारीमा भएकाले घटना हुने वितिकै आउन पाइएन । रणनीति बनाउनुपर्यो । योजना बनाउनुपर्यो । सुरक्षा प्रमुखसँग बसेर प्रधानमन्त्रीसँग बसेर रणनीति बनाउँदा ढिलो भयो,' उनले भने । 

मन्त्री गुरुङले अनाधिकृत मदरसालाई राज्यको नियमन भित्र ल्याएर निगरानी गरिने बताए । 

मन्त्री गुरुङले सुरक्षा संयन्त्रलाई दरो र जवाफदेही बनाउन प्रतिबद्ध रहेको र अब योजना बनाउने पनि बताए ।