कांग्रेसले किन बोलायो केन्द्रीय समिति बैठक ?

काठमाडौँ । नेपाली नेपाली कांग्रेस केन्द्रीय कार्यसमिति बैठक साउन २४ गते बस्ने भएको छ । कांग्रेसले साउन २४ गते आइतबार दिउँसो १ बजे केन्द्रीय कार्यालय सानेपामा बस्ने गरी केन्द्रीय समिति बैठक बोलाएको हो ।

पार्टी कार्यालयका कार्यबाहक मुख्य सचिव कृष्णप्रसाद दुलालले जारी गरेको विज्ञप्तिमा भनिएको छ( उक्त बैठकमा केन्द्रीय कार्यसमितिका पदाधिकारी र सदस्यहरुको उपरस्थितिका लागि निर्देशानुसार अनुरोध गरिन्छ ।

Watch On

यसअघि साउन १३ गते केन्द्रीय समितिको आकस्मिक बैठक बसेको थियो । नेता गोपालमान श्रेष्ठको निधन भएपछि बसेको उक्त बैठकले श्रेष्ठलाई दिइएको वरिष्ठ नेताको सम्मान अनुमोदन गरेको थियो ।

कांग्रेसका एक नेताका अनुसार, श्रेष्ठको निधन नभएको भए नियमित बैठक नै १३ गते बोलाउने तयारी थियो । १३ गते बसेको आकस्मिक बैठकले गोपालमानको विषयमा बाहेक अन्य निर्णय गरेन ।

साउन २४ गते केन्द्रीय समितिको बैठक बस्ने भनिए पनि एजेन्डा खुलाइएको छैन । केही दिनभित्रै कार्य सम्पादन समिति वा पदाधिकारी बैठक बसेर एजेन्डा तय गर्ने तयारी छ ।

कांग्रेसको १५औं महाधिवेशनको प्रक्रिया आगामी महिनाको पहिलो हप्ताबाट सुरु हुँदै छ । महाधिवेशन प्रक्रिया सुरु हुनै लाग्दा कांग्रेस भने विभाजनको संघारमा छ।

कांग्रेसको असन्तुष्ट पक्षले साउन २९ मा सुरु हुने गरी राष्ट्रिय भेलाको घोषणा गरेको छ भने पूर्वमहामन्त्री शशांक कोइरालाको संयोजकत्वमा भेला आयोजक समिति गठन गरेको छ।

सहमति र पार्टी एकताका लागि इतर पक्षले ५ बुँदे प्रस्ताव सार्वजनिक गरे पनि संस्थापन पक्षले जवाफ दिएको छैन। केन्द्रीय समिति बैठकबाटै इतर पक्षलाई जवाफ दिने तयारी रहेको एक नेताले बताए ।

इतर पक्षले राखेका ५ प्रस्तावमध्ये विशेष महाधिवेशनबाट निर्वाचित केन्द्रीय समिति र चौधौं महाधिवेशनबाट निर्वाचित पदाधिकारी तथा सदस्यलाई समायोजन गर्ने र क्रियाशील सदस्यताको डिजिटल अद्यावधिक गर्नेमा सहमति जुट्न सकेको छैन।

कांग्रेसका निवर्तमान सभापति शेरबहादुर देउवा साउन २४ गते नै स्वदेश फर्किने जनाइएको छ।