अपडेटः हेटौंडामा खोलाले बगाएका १ बालिकाको मृत्यु, १ जना आफैँ खोलाबाट निस्कन सफल, २ को खोजी जारी

मकवानपुर । मकवानपुरको हेटौंडा उपमहानगरपालिका–१९, बासुदेवस्थित खहरे खोलाले लच्का तर्ने क्रममा बगाएका २ बालिका बेपत्ता भएका छन् भने एकको मृत्यु भएको छ । 

खोज तथा उद्धारका क्रममा ८ वर्षीया रोसनी स्याङताङलाई बगेको स्थानबाट करिब ५०० मिटर तल रुखको जरामा अडिएको अवस्थामा फेला पारिएको थियो । उनलाई उपचारका लागि हेटौंडा अस्पताल लगिए पनि अस्पतालले मृत घोषणा गरेको प्रहरीले जनाएको छ ।

Watch On

त्यस्तै, १३ वर्षीया सिमा भोलन आफैं खोलाबाट निस्कन सफल भएकी छन् । उनलाई सामान्य चोट लागेको र उपचारका लागि हेटौंडा अस्पताल लगिएको छ ।

हाल ११ वर्षीया सुमित्रा भोलन र १२ वर्षीया बिनिता भोलनको खोजी भइरहेको प्रहरीले जनाएको छ ।

मंगलबार साँझ करिब ५ः५५ बजे निर्मल माध्यमिक विद्यालय, बस्तिपुरबाट घर फर्कने क्रममा खोला तर्ने क्रममा उनीहरूलाई बासुदेव खहरे खोलाले बगाएको जिल्ला प्रहरी कार्यालय मकवानपुरले जनाएको छ।

घटनाको खबर प्राप्त हुनासाथ इलाका प्रहरी कार्यालय नेवारपानीबाट प्रहरी नायब निरीक्षकको कमाण्डमा तथा जिल्ला प्रहरी कार्यालय मकवानपुरबाट प्रहरी उपरीक्षक श्यामबहादुर खत्रीको कमाण्डमा २० जना प्रहरी घटनास्थलमा खटिएका थिए ।

थप खोज तथा उद्धारका लागि बागमती प्रदेश विपद् व्यवस्थापन गुल्म हेटौंडाबाट प्रहरी निरीक्षक विजय राज तिमल्सेनाको कमाण्डमा ११ जना, सशस्त्र प्रहरी बल नेपाल १४ नं. गण हेडक्वार्टर हेटौंडाबाट सशस्त्र प्रहरी उपरीक्षक निबनकुमार खड्काको कमाण्डमा १७ जना तथा नेपाली सेनाको टोलीसमेत परिचालन गरिएको छ ।