५ हजार बेपत्ता हुँदा ४ जनाको पुनर्जन्म

काठमाडौँ । भोटेकोशीमा बाढी आएको ११ पुग्दा हरेक दिनजसो मृतक र सम्पर्कविहीनको संख्या बढिरहेको छ । नेपाली सेना, सशस्त्र प्रहरी र नेपाल प्रहरीका सुरक्षाकर्मीसहित देशी, विदेशी उद्धारकर्मी निरन्तर खटिँदा पनि बाढीमा परेर हराइरहेकाहरुको खोजीमा अपेक्षाकृत सफलता हासिल हुन सकेको छैन ।

Watch On

उद्धारकर्मीले प्रभावित क्षेत्रका बस्ती र जलविद्युत आयोजनाका सुरुङमा खोजी गरिरहँदा दशौँ दिन (शुक्रबार) २ जनाको र ११औँ दिन (शनिबार) २ जनाको जीवितै उद्धार गरिएको छ । त्रिशूली ३ ए को सुरुङबाट शुक्रबार सञ्जय शाह र कबिर महर्जन तथा माथिल्लो त्रिशूली १ बाट शनिबार एक चिनियाँ नागरिक र बेत्राबतीस्थित एक घरबाट ६० वर्षीया चण्डिका श्रेष्ठको जीवितै उद्धार भयो ।

सुरुङमा फसेकाहरुलाई जीवितै उद्धार गर्न सकिन्छ कि आशा त धेरैलाई थियो । तर जीवितै भेटिन्छन् भन्ने विश्वास कम मानिसलाई मात्र थियो । त्यही अवस्थामा दशौं र एघारौँ दिनमा चमत्कार नै भयो । निरन्तरको प्रयासमा चार जनाले पुनर्जन्म नै पाए ।

जो जीवित भेटिए उनीहरुको पनि अनुभव यस्तै छ अनि उनीहरुका आफन्त पनि यसै भन्छन् । चमत्कारै भयो– सबैको साझा टिप्पणी छ ।

यतिसम्मकि, बेत्रावतीबाट उद्धार गरिएकी चण्डिकाका परिवारले त पूर्णरुपमा आशा मारेर काजक्रिया सुरु गरिरहेका थिए । आठौँ दिनसम्म पनि अत्तोपत्तो नलागेपछि काजक्रिया सुरु गरिएको उनका आफन्तले बताएका छन् ।

रसुवादेखि धादिङसम्म विपत्ति मच्चाएको भदौ १० गतेको बाढीले कति मानिसलाई बगायो ? कति मानिसको मृत्यु भयो ? वा कति मानिस अझै जीवनको पर्खाइमा छन् ? यसको कुनै टुंगो छैन ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अहिलेसम्म करिव ५ हजार मानिस सम्पर्कविहीन छन् । मृतकको संख्या १३ सय ४४ पुगेको छ । मृतक र सम्पर्कविहीनको संख्या दिन दिनै बढिरहेको छ । यसरी संख्या बढ्ने क्रम कहिले रोकिन्छ ? यसको जवाफ पनि कसैसँग छैन ।

प्राधिकरणले सार्वजनिक गरेको पछिल्लो विवरणअनुसार सम्पर्कविहीनको सूचीमा ५८९ जना विदेशी नागरिकसमेत छन् । त्यस्तै करिव १०० जना सुरक्षाकर्मी र कर्मचारी ११ दिनदेखि सम्पर्कविहीन छन् । 
भोटेकोशी बाढीका ११ दिनमा १३ हजार ९८ जनाको स्थल र हवाई उद्धार भइसक्दा अझै कैयन् नागरिक उद्धारको पर्खाइमा छन् ।

भोटेकोशीको भेलबाढीले अकल्पनीय मानवीय क्षति पुर्यायो । ३३ हजार मानिस प्रत्यक्ष प्रभावित हुँदा परोक्ष रुपमा लाखौँ मानिसको जीवनमा धक्का पुर्यायो । सँगै भौतिक क्षतिको त अझै हिसाब किताब हुन सकेको छैन ।

प्रारम्भिक विवरणअनुसार, बाढीले ७ हजार ५७० निजी घर, ४८ वटा सरकारी संरचना (भवन) १८ विद्यालय, ७ स्वास्थ्य संस्था, ५५ किलोमिटर पक्की सडक र ३७ वटा मोटरेबल पक्की पुल र ६८ वटा झोलुङ्गे पुल बगायो । खर्बौं लगानीमा बनाइएका १३ वटा जलविद्युत आयोजनाले पनि भोटेकोशी बाढीको मार खेप्नु पर्यो ।