अब पर्सामा हुलाकमार्फत घरघरमै पुग्नेछ टेलिकमको सिमकार्ड

वीरगञ्ज (पर्सा) । नेपाल टेलिकमले पर्सामा सेवाग्राहीको घरमै सिमकार्ड पुर्‍याउने सेवा सुरु गरेको छ । हुलाक सेवा विभागसँगको सहकार्यमा टेलिकमले जिल्लाभरिका सेवाग्राहीलाई घरदैलोमै सिमकार्ड उपलब्ध गराउने व्यवस्था मिलाएको हो ।

Watch On

जिल्ला हुलाक कार्यालयका हुलाक अधिकृत नमनाथ यादवका अनुसार सेवाग्राहीले नेपाल टेलिकमको अनलाइन फाराम भरेपछि हुलाक सेवामार्फत घरमै सिमकार्ड प्राप्त गर्न सक्नेछन् । सर्वसाधारणलाई सहज, सरल र सुलभ रूपमा सेवा उपलब्ध गराउने उद्देश्यले यो सेवा सुरु गरिएको उनले बताए ।

यो सेवासँगै सिमकार्ड लिन टेलिकम कार्यालय वा अन्य वितरण केन्द्रसम्म पुग्नुपर्ने बाध्यता हट्ने अपेक्षा गरिएको छ । अब नागरिकले घरमै बसेर सरकारी सेवा प्राप्त गर्न सक्नेछन् ।

सेवा सुरु भएसँगै हुलाक कार्यालयका कर्मचारीले वीरगञ्ज महानगरपालिका–१०, रानीघाट निवासी किरणकुमारी चौहानको घरमै पुगेर पहिलो सिमकार्ड उपलब्ध गराएका छन् ।

यसअघि हुलाक सेवा विभागले चिठीपत्र, पार्सल, द्रुत डाँक सेवा (ईएमएस) र हुलाक बचत बैङ्कसम्बन्धी सेवा प्रदान गर्दै आएको थियो । पछिल्लो समय विभागले आफ्नो सेवालाई विस्तार गर्दै अन्य सरकारी निकायका सेवा तथा सामग्रीको वितरणमा समेत सहकार्य गर्न थालेको छ ।

हुलाक सेवा विभाग, यातायात व्यवस्था विभाग र सुरक्षण मुद्रण केन्द्रबीच भएको सम्झौताअनुसार सवारी चालक अनुमतिपत्र (स्मार्ट लाइसेन्स) लगायत महत्त्वपूर्ण सरकारी कागजात हुलाकमार्फत ढुवानी तथा वितरण हुँदै आएको छ ।

त्यसैगरी, हुलाक वस्तु तथा पार्सल कहाँ पुगे भन्ने जानकारी अनलाइनबाटै प्राप्त गर्न सकिने गरी ट्र्याकिङ प्रणालीलाई समेत थप व्यवस्थित बनाइएको विभागले जनाएको छ ।