बाँसबारी जग्गा प्रकरणमा बिनोद चौधरीमाथि पनि अनुसन्धान हुन्छ : गृहमन्त्री श्रेष्ठ

काठमाडौँ । गृहमन्त्री नारायणकाजी श्रेष्ठले बाँसबारी जग्गा प्रकरणमा बिनोद चौधरीमाथि पनि छानबिन हुने बताएका छन् । प्रतिनिधसभाको राज्य व्यवस्था तथा सुशासन समितिको बैठकमा उनले कारबाहीको दायरामा ल्याउनुपर्ने सबैमाथि छानबिन हुने बताएका हुन् । 

राष्ट्रिय स्वतन्त्र पार्टीका सभापति रवि लामिछानेले बैठकमा च्याम्पियन फुटवेयरमा अरुण चौधरी जत्तिकै सेयर भएका अन्य साझेदारमध्ये सत्ता साझेदार दलका सांसद विनोद चौधरीको पनि देखिएकोले उनीमाथि बयान लिए नलिएकोबारे प्रश्न गरेका थिए । 

जवाफमा गृहमन्त्री श्रेष्ठले जो जो सँग बुझ्नुपर्छ सबैलाई अनुसन्धानको दायरामा ल्याउने प्रतिवद्धता जनाएका हुन् । गृहमन्त्री श्रेष्ठले भने, ‘अनुसन्धानको प्रक्रियामा जो जोलाई लिखत गर्न, बुझ्न ल्याउनुपर्छ ती सबैलाई ल्याउँछौं ।’

बाँसबारी छालाजुत्ता कारखानाको जग्गा तत्कालिन च्याम्पियन फुटवेयर कम्पनी मातहत ल्याइएको भेटिएको थियो । उक्त विषयमा प्रहरीको केन्द्रीय अनुसन्धान ब्यूरो (सीआईबी) ले अनुसन्धान गरिरहेको छ । उक्त च्याम्पियन फुटवेयरमा अरुण चौधरीसँगै विनोद चौधरीको पनि सेयर भएको भेटिएको सीआईबीले जनाएको छ । 

गृहमन्त्री श्रेष्ठले अरुण चौधरीलाई दुई दिनभित्र अनुसन्धान सकेर रिहा गर्न अदालतले निर्देशन दिने कुरा अनपेक्षित र नेपालको न्यायीक इतिहासमै पहिलो भएको भन्दै असन्तुष्टि पनि व्यक्त गरे । यद्यपी उनले अदालतको सम्मान गर्ने र आदेश कार्यान्वयन गर्ने जिकिर गरे ।