सकुशल नेपाल आइन् कुवेतमा बन्धक बनेकी नविन र मनिषाकी आमा

काठमाडौँ । एक महिनाअघि दैलेखका नविन र मनिषाले सिधाकुराको स्टुडियोमा आँशु झार्दै कुवेतमा बन्दक बनेकी आमाको पिडा सुनाएका थिए । दाजुबहिनीले हामीलाई सोधेका थिए, ‘सर हाम्री आमालाई सकुशल नेपाल ल्याउन सकिन्छ ? शनिबार बिहान नविन र मनिषाले यो प्रश्न जवाफ पाउँदै थिए । 

Watch On

वैदेशिक रोजगारीको खोजिमा सुना गत वर्ष घर छाडेकी दैलेख नारायाण नगरपालिका ११ की खगिसर सुनार घर फर्कीदै थिइन् । खगिसरा सनिबार साँझ ६ बजेको उडान मार्फत कुवेतबाट स्वदेश आउँदै थिइन् । 

बिहान ३ बजे, काठमाडौँमा झरीले चिसो बनाइरहेको थियो । त्रिभुुवन अन्तराष्ट्रि विमानस्थलको आगमन कक्ष बाहिर नविन सुनार ओत लागेर आगमन कक्षको ढोका चियाइरहेका थिए । बेला बेलामा मोवाइल स्क्रोल गर्थे, फोटो हेर्थे, समय हेर्थे । ‘कतिबेला आमा आगमन कक्षबाट निस्कन्छिन् र उनलाई देख्न पाइएला ?’ आमालाई भेट्नुअघिको तड्पाहट नविनको आँखामा प्रस्टै झल्किन्थ्यो । 

तस्विर : विमानस्थलमा आमाको पर्खाइमा नवीन सुनार

कुवेतबाट आएको जजिरा एयरलाइन्सको विमान ल्याण्ड भयो, केही छिनमा खगिसरा विमानस्थलको आगमन कक्षमा झुुल्किइन् । नविन खुशी हुँदै (आमा आउनुभयाे भन्दै) आमासामु पुगे । बाँचेर फर्कन्छु भन्ने सोच्न समेत छाडेकी खगिसरा छोरालाई अघि देख्दा हेरिरहिन्, केही बोल्न सकिनन् । नविनले नै सोधे, ‘नेपाल आउँदा कस्तो लागिरहेको छ आमा ?’ खगिसराले आँखैबाट जवाफ दिइन् । 

२०७९ असोजमा विदेश गएका मानिसहरु समेत घर फर्कदै थिए । तर, खगिसरा रोजगारीका लागि विदेश जाने भन्दै छोराछोरीलाई भाडाको कोठामा राखेर काठमाडौँ आइन् । तीन महिना काठमाडौँमा भौतारिएपछि गत पुसमा खगिसरा भारतको बाटो हुँदै घरेलु महिला कामदारको रुपमा कुवेत पुगेकी थिइन्  । घरेलु कामदारका रुपमा कुवेत पुगेकी खगिसराले केही समय काम गरिन् । छोरा नवीन सुनारका अनुसार सुरुमा खगिसराले घरमा पैसा पनि पठाएकी थिइन् ।  

तर, केही समयपछि उनी घरेलु कामदारको रुपमा रहेको घरबाट निकै दबाब र यातानाको शिकार भइन् । साहुनीले कुट्पिट गर्ने गरेको भन्दै खगिसरा छोराछोरीसँग रोएकी थिइन् । 

खगिसराले कति पिडा त छोराछोरीलाई कठिन हुन्छ भनेर पहिला सुनाएकी थिइन् तर एक दिन  भिडियो कलमै आमामाथि आक्रमण भएको छोराछोरीले देखे । 

त्यसपछि छोराछोरी आमालाई उद्धार गर्न गुहार्न थाले । कुवेतमा खगिसरा बिरामी पर्दै गइन्, पछिल्ला दिनमा त खगिसरा शारिरिकरुपमा निकै कमजोर भएकी थिइन्, भने मानसिकरुपमा समेत विचलित भएकी थिइन् । खगिसरलाई कुवेत पुुर्याएर काम लगाउने कम्पनीले नेपाल फर्काउन ४ लाख लाग्ने भनिरहेको थियो । तर खगिसराका छोराछोरी आमाको उद्धारका लागि काठमाडौँ आउने गाडी भाडा समेत अरुले नै सहयोग गर्नुपर्ने अवस्थामा थिए । उनिहरुका लागि आमाको उद्धार असम्भव लाग्न थालेको थियो । उता आमाको अवस्था दिनप्रतिदिन बिग्रिदै थियो, यता छोराछोरीको छटपटी बढीरहेको थियो । 

आमाको उद्धारको लागि भन्दै केही दिनअघि नविन र मनिषा सिधाकुरा डट कमले कार्यालयमै आएका थिए । खगिसरा र उनका छोराछोरीका विषय प्रकाशन प्रशारण गरेपछि धेरै नेपालीले उनका बारेमा चासो राखेका थिए । कुवेतमा रहेको नेपाली पुष्कर धामी, उमेश थापा, राजु धमला लगायतले तत्कालै खगिसरलाई उद्धारका लागि पहल सुरु गरेका थिए । तर २ पटकसम्म खगिसरालाई बन्दक बनाइएको घरबाट निकाल्ने प्रयास असफल भएको थियो । उनीहरुसँगै कुवेत स्थित एनआरएनए, यात्री टिम र  नेपाली दुतावासले निरन्तर पहल गरेपछि  २ साताअघि मात्रै खगिसरालाई बन्धक बनाइएको घरबाट निकालिएको थियो । त्यसपछि दुतावासको सेल्टरमा आइपुगेकी खगिसरलाई दुतावासले केही दिन काउन्सिलिङमा राखेको थियो । त्यसपछि कानुनी प्रक्रिया पुरा गराएर दुतावासलेनै नेपाल पठाएको हो । 

अब खगिसरालाई फेरि विदेश जान मन छैन, ‘आफ्ना छोराछोरीको भविष्यको चिन्ता त छँदै छ तर विदेश त म जान्न’, खगिसरा भन्छिन् । 

आमाको हात समाएर उभिएका नविनले आमालाई हेर्दै भने, ‘आमाले हामीलाई यति दुख गरेर हुर्काउनुभयो, अब आमाका लागि हामीले दुख गर्छाैँ ।’

सम्बन्धित समाचार : 

कुवेतमा बन्धक आमाको उद्धारमा हिँडेका दाजु बहिनी