विदेशबाट फर्किएर नेपालमा नै उद्यम गरिरहेका ८ उद्यमी पुरस्कृत

काठमाडौँ । श्रम रोजगार तथा सामाजिक सुरक्षा मन्त्रालयले विदेशबाट नेपाल फर्किएर विभिन्न क्षेत्रमा लगानी गरेका नेपाली उद्यमीलाई पुरस्कृत गरेको छ । मन्त्रालयले वैदेशिक रोजगारीबाट नेपाल फर्केर नेपालमा उद्यम गरिरहेका ८ उद्यमीलाई पुरस्कृत गरेको हो । मन्त्रालयले उनीहरुलाई मन्त्रालयमै बोलाएर खादा, नगद र प्रमाणपत्र दिएर सम्मान गरेको हो । 

Watch On

मन्त्रालयले झापा गाउँपालिका ३ झापाका चन्द्र प्रकाश बस्नेतलाई उत्कृष्ठ उद्यमी राष्ट्रिय पुरस्कार प्रदान गरेको छ । एग्री सेन्टर झापा प्रा।लि।का उनलाई मन्त्रालयले एक लाख पचास हजार नगदका साथ सम्मान गरेको छ । त्यस्तै ७ उद्यमीहरु उद्यमी राष्ट्रिय पुरस्कारबाट सम्मानित भएका छन् । 

उद्यमी राष्ट्रिय पुरस्कारबाट सम्मानित हुनेहरुमा गुल्मीका रविलाल पन्थ, झापाका मोहन प्रसाद संग्रौला, जुम्लाका टक्क बहादुर नेपाली, कन्चनपुरका चन्द्र सिंह थापा,नुवाकोटका अर्जुन परियार, म्याग्दीका भुपेन्द्र शर्मा र बाराका हिराबहादुर थापा रहेका छन् । उनीहरु सबैले पचहत्तर हजार नगदका साथ प्रमाणपत्र पाएका छन् । 

उत्कृष्ट उद्यमीहरुलाई सम्मान गर्दै श्रममन्त्री डिपी अर्यालले वैदेशिक रोजगारीमा रहेका नेपालीहरुलाई फर्किएर नेपालमा नै रोजगार गर्न सक्ने वातावरण बनाउन सरकार प्रयासरत भएको बताएका छन् । ‘हामी सकेसम्म नेपालीलाई विदेश जानै नपरोस् भनेर काम गरिरहेका छौँ । तर बाध्यताले विदेशीएर फर्किएका नेपालीलाई पुन विदेशीनुपर्ने बाध्यता अन्त्य गर्नमा सरकार प्राथमिकताका साथ लागेको छ ।’, मन्त्री अर्यालले भने ।