काठमाडाैँ । नेपाल प्रिमियर लिग (एनपिएल) अन्तर्गत चितवन राइनोजविरुद्धको खेलमा पोखरा एभेन्जर्सले लज्जास्पद हार व्योहोरेको छ । 

कीर्तिपुरस्थित त्रिभुवन विश्वविद्यालय क्रिकेट मैदानमा पोखरा एभेञ्जर्सका कप्तान कुशल भुर्तेलले टस जित्दै चितवन राइनोजलाई ब्याटिङको निम्तो दिएका थिए । जहाँ चितवन राइनोजले निर्धारित २० ओभरमा १६१ रन बनाएको थियो । चितवनले दिएको लक्ष्य पछ्याएको पोखराले १३.२ ओभरमा ७४ रन मात्रै बनाएको हो । एनपीएल प्रतियोगितामा पहिलोपटक मैदानमा उत्रिएको पोखरा एभेञ्जर्सले पहिलो खेलमै लज्जास्पद हार व्योहोरेको हो । 

पोखरा एभेन्जर्सले पहिलो बलमै ओपनर कुशल भुर्तेललाई गुमाएको थियो भने पहिलो ओभरमा ३ ब्याट्सम्यान गुमाएको थियो । जसमा सोहेल तनभिरको बलमा कुशल भुर्तेल आउट भएका थिए भने पाचौँ बलमा सोहेल तनभिरले नै दिलिप नाथलाई आउट गराएका थिए । त्यस्तै तनभिरकै बलको सामना गर्न नसक्दा छैटौँ बलमा बास डि लिडसमेत आउट भएका थिए । 

त्यस्तै ३.१ ओभरमा रिजन ढकालको बलमा दिनेश खरेल आउट भएका थिए भने ३.४ ओभरमा किरण ठगुन्ना खेलबाट बाहिरिएका थिए । त्यस्तै सोही ओभरमा अर्थात ३.६ ओभरमा माइकल लिस्क खेलबाट बाहिरिएका थिए । 

त्यस्तै ६.२ ओभरमा रेमन रेइफ, १०.२ ओभरमा म्याट क्रिट्ले, १२.५ ओभरमा नारायण जोशी, १३.२ ओभरमा बिपिन खत्री आउट भएका हुन् ।