स्वास्थ्यमन्त्री मेहताको एक्सन: उपेन्द्र महतोको मेडिसिटीदेखि सुनिल शर्माको केमसी र नोबेलसम्म कारबाहीमा

काठमाडौँ । स्वास्थ्य तथा खाद्य स्वच्छता मन्त्री निशा मेहताले शुल्क नतिर्ने अस्पताल तथा मेडिकल कलेजहरुमाथि कारबाही प्रक्रिया अगाडि बढाएकी छिन् । 

मन्त्री मेहताको निर्देशनमा स्वास्थ्य मन्त्रालयले बेडसंख्याअनुसार बुझाउनुपर्ने नियमानुसारको शुल्क नतिर्ने ११ वटा स्वास्थ्य संस्थाबाट कुल १ करोड ७८ लाख ८४ हजार रुपैयाँ असुल गर्ने निर्णय गरेको हो । 

Watch On

बेडसंख्याअनुसार शुल्क नबुझाउने स्वास्थ्य संस्थाहरुमा नेपाल मेडिसिटी अस्पताल ललितपुर १८ लाख, गण्डकी मेडिकल कलेज पोखरा १० लाख, नोबेल मेडिकल कलेज विराटनगर २४ लाख ४४ हजार, नेपाल मेडिकल कलेज १० लाख, किष्ट मेडिकल कलेज ललितपुर १८ लाख, धुलिखेल अस्पताल १७ लाख, मणिपाल कलेज पोखरा १८ लाख, काठमाडौं मेडिकल कलेज १८ लाख, देवदह मेडिकल कलेज ८ लाख, युनिभर्सल मेडिकल कलेज भैरहवा ३० लाख रुपैयाँ वक्यौता रहेको छ । 

मन्त्रालयले स्वास्थ्य क्षेत्रमा सुशासन, पारदर्शिता र कानुनी जवाफदेहिता सुनिश्चित गर्ने उद्देश्यका साथ उक्त निर्णय कार्यान्वयन प्रक्रियामा अघि बढाएको हो । महालेखा परीक्षकको प्रतिवेदनले औंल्याएका विषयहरूलाई सम्बोधन गर्दै बक्यौता रकम असुली प्रक्रिया अगाडि बढाइएको मन्त्रालयले जनाएको छ ।

मन्त्री मेहताले स्वास्थ्य सेवा क्षेत्रलाई थप व्यवस्थित, जिम्मेवार र नियमसम्मत बनाउन मन्त्रालय प्रतिबद्ध रहेको बताउँदै कानुन र मापदण्ड विपरीत हुने गतिविधिप्रति शून्य सहनशीलताको नीति अवलम्बन गरिने स्पष्ट पारेकी छिन् ।