मुगुमा एक बालिकामाथी सामुहिक बलात्कार, नगर प्रहरी र सरकारी कर्मचारीसहित ५ जना पक्राउ

मुगु । मुगुमा १४ वर्षीया बालिकालाई प्रलोभनमा पारी सामूहिक बलात्कार गरेको आरोपमा नगर प्रहरी र सरकारी कर्मचारीसहित पाँच जना पक्राउ परेका छन्  ।

Watch On

पक्राउ पर्नेमा छायाँनाथ रारा नगरपालिकामा कार्यरत नगर प्रहरी ३० वर्षीय वसन्त बहादुर कार्की र कृषि विकास कार्यालय मुगुका कार्यालय सहयोगी २२ वर्षीय वसन्त रोकाया समेत रहेका छन्  । नगर प्रहरी कार्की सोही नगरपालिकाका वडा नं ५ निवासी हुन् । त्यस्तै पक्राउ परेका अन्य ३ जना बालक भएका कारण उनीहरुको पहिचान गोप्य राखिएको प्रहरीले जनाएको छ । 

उनीहरू सबैलाई पुस २५ गते पक्राउ गरी पाँच दिनको म्याद थप गरी अनुसन्धान अगाडि बढाइएको जिल्ला प्रहरी कार्यालय मुगुका निमित्त सूचना अधिकारी इन्स्पेक्टर भूपेन्द्रकुमार बुढाथोकीले जानकारी गराए । प्रहरीका अनुसार उक्त घटनामा कृषि विकास कार्यालय गमगढीकै सवारी चालक ३० वर्षीय पदम बहादुर कठायत सहित चार जना फरार छन् । चालक कठायत चन्दननाथ नगरपालिका–७ का बासिन्दा हुन् । 

बालिकामाथि भाद्र १६ र असोज १० गते उक्त समूहले छुट्टाछुट्टै समयमा सामुहिक बलात्कार गरेको भन्दै बालिकासहित उनका आफन्तले ९ जनाविरुद्ध पुस २३ गते जिल्ला  प्रहरी कार्यालय, मुगुमा उजुरी दिएका थिए । 

पीडित पक्षको उजुरीपश्चात ९ जना मध्ये ५ जनालाई गमगढी बजारबाट पक्राउ गरिएको र चालक भनिएका ३० वर्षिया पदम बहादुर कठायत, मुगु छाँयानाथ रारा नगरपालिकाका १४ का १४ बर्षिया १ बालक र सोही स्थानका १५ वर्षिया २ बालक गरि ४ जना फरार रहेको प्रहरीले जनाएको छ ।

गर्भ रहेको थाहा पाएपछि परेको थियो उजुरी

बालिकाको स्वास्थ्य अवस्था बिग्रन थालेपछि परिवारले उनलाई अस्पताल लगेको थियो । अस्पतालमा चेकजाँचका क्रममा उनको पेटमा १८ हप्ताको गर्भ रहेको देखिएको थियो । गर्भ रहेको थाहा पाएपछि बालिकाले आफूमाथि विभिन्न प्रलोभन देखाएर उक्त समूहले बलात्कार गरेको परिवारलाई बताएकी थिइन् ।ततपश्चात प्रहरीमा उजुरी परेकाे हाे । 

बालिकाका अनुसार असोज १० गते वसन्त बहादुर कार्कीले आफू बस्ने डेरामै गई एकछिन काम छ भनी बोलाएर तान्दै उसको कोठामा लगेको र त्यहाँ वसन्त रोकाया र पदमबहादुर रोकायासमेतले मिलेर उनीमाथि बलात्कार गरेका हुन् ।  बालिकाको बयान र जाहेरीका आधारमा पाँच जनालाई पक्राउ गरेको प्रहरीले फरार भएकाहरूलाई पनि खोजि गरिरहेको बताएको छ । पीडित बालिकालाई हाल एक संस्थाको संरक्षणमा राखिएको छ ।