काठमाडौँ । व्यवसायी ज्ञानेन्द्र खड्काले आफू दिनदहाडै ललितपुरबाट अपहरणमा परेको दाबी गरेका छन् । नेपाली कांग्रेसका केन्द्रिय सदस्य एवम् गुण्डा पृष्ठभूमिका गणेश लामा र उनका साथी सहदेव कक्षपतिले आफूलाई अपहरण गरेर ८ घण्टा होटलमा बन्धक बनाएको र करोडौँको लेनदेनको फिरौतीको कागज गराएको व्यवसायी खड्काले आरोप लगाएका छन् । 

बुधबार आफ्नो सामाजिक सञ्जाल फेसबुकबाट एक प्रेस वक्तव्य जारी गर्दै खड्काले यो घटना पुस २३ गते घटेको तर असुरक्षाका कारण आज मात्रै मुख खोल्न सकेको बताएका छन् ।

‘गणेश लामा र सहदेव कक्षपतिलगायतले ललितपुर ढोलाहिटी आदर्श टोलबाट अपहरण गरी सानेपास्थित लण्डन हाउस होटलमा लगेर ८ घण्टा बन्धक बनाएको र त्रासमा पारेर करकापमा फिरौती स्वरुप करोडौं लेनदेनको कागज गराए ।,’खड्काले विज्ञप्तिमा भनेका छन् । परिवारका सदस्य र प्रहरीलाई घटना भनिस भने ठिक नहुने धम्कीका कारण यो विषय पहिल्यै भन्न नसकेको र अहिले सुरक्षाको प्रत्याभूति भएपछि बल्ल सार्वजनिक रुपमा यो विषय बाहिर ल्याउन सकेको प्रेस वक्तव्यमा उल्लेख गरेका छन् । ‘ डकैतहरुलाई पैसा मोह भए जस्तै हामीलाई ज्यानको सुरक्षा महत्वपूर्ण भएकाले समयमै सार्वजनिक गर्न सकिएन ।

यहाँबाट निस्केर घरपरिवारलाई भनिस् र पुलिसकोमा गइस् भने राम्रो हुँदैन भनेर त्रसित गरेकाले दिमागी रुपमा समेत ठूलो असर परेको छ । पहिले आफू र परिवार सुरक्षित स्थानमा हुनु र अपराधीलाई कानूनी कठघरामा उभ्याउनु मेरो प्रमुख प्राथमिकता थियो ।

त्यसैले आज सबै कानूनी प्रक्रिया सकेपछि हिम्मत जुटाएर यो लेख्दैछु,’ खड्काले भनेको छन् । घटनाबारे उपत्यका अपराध महाशाखामा माघ २८ गते जाहेरी दिएको पनि खड्काले जनाएका छन् ।

जाहेरीपछि मुद्दा कमजोर बनाउन खोजिएको र एक सातासम्म पनि कारबाही अघि नबढेको र अहिले आएर फिरौती स्वरुप लिएको २५ लाख फिर्ता गरेर मिलापत्र गर्न दबाब भइरहेको उनले उल्लेख गरेका छन् ।