जो भूकम्पबाट आफै जोगिए तर राज्यले चिसोबाट पनि जोगाउन सकेन

जाजरकाेट । कार्तिक १७ गते रातिको भूकम्पका कारण जाजरकोट र पश्चिम रुकुमका १५४ जनाले ज्यान गुमाए । ३ सय ६६ जना घाइते मध्ये केही उपचार पछि घर फर्किएका छन् । राष्ट्रिय विपद पूर्वतयारी तथा प्रतिकार्य शाखाका अनुसार २६ हजार ५ सय ५७ घर पूर्णरुपमा भत्किएका छन् भने ३५ हजार ४५५ घर आंशिकरूपमा भत्किएका छन् । 

Watch On

स्थलगत रिपोर्टिङका क्रममा आशिंकरुपमा भत्किएका आधिकांश घरमा पनि बस्न सक्ने अवस्था छैन । अहिले १ लाख ८० हजार जना भन्दा धेरै भूकम्प पीडित राहतमा पाएको पालमुनि चिसो काटिरहेका छन् । 

भूकम्प लगत्तै घाइतेहरूको उद्धारमा सक्रियता देखाएका राज्यका संयन्त्र, त्यसपछिको राहत र अस्थायी आवासमा भने चुकेका छन् । 

संविधानतः गाँस बास र कपासको मौलिक हक भएका नागरिक एकसरो न्यानो कपडाको अभावमा ज्यान गुमाउन बाध्य भएका छन् । पछिल्लो एक सातामा मात्रै भूकम्पबाट जोगिएका ७ जनाले चिसोका कारण ज्यान गुमाएका छन् । भूकम्पका कारण घर ढलेपछि पालमा बस्दै आएका नलगाड नगरपालिका ४ च्युरीदाराका ८४ वर्षीय गोपालबहादुर रावल, ४८ वर्षीय पम्फा रावल, बारेकोट गाउँपालिका ४ जिरीका ७९ वर्षीय नरेन्द्रबहादुर सिंह, बारेकोट १ रामीडाँडाका ७० वर्षीय डुमे पुन, भेरी नगरपालिका २ का ८८ वर्षीय धुलेश्वर कार्की, जुनीचाँदे गाउँपालिका –४ लुहादहकी ८९ वर्षीया सुगिली नेपाली, छेडागाड नगरपालिका –१३ थानवाडाकी ५६ वर्षीया मनसरी कामी चिसोबाट जोगिन नसक्दा ज्यान गुमाए । 

उमेर ढल्किएका उनीहरू श्वासप्रश्वास सम्बन्धी दीर्घरोगी समेत थिए । बढ्दो चिसोमा पालको मात्रै भरपर्दा उनीहरूको स्वास्थ्य समस्या बढेको थियो । तर न्यानो कपडाको अभाव, पोसिलो आहार र औषधी उपचारको अभावमा उनिहरुले ज्यान गुमाएको स्थानीय बारेकोटका स्थानीय रविन्द्र सिंहले बताए । रविन्द्रले गुनासो गरे “भूकम्पबाट जोगिएकाहरुलाई चिसोबाट बचाउन सकिएन, राज्यले पाल दिएर टार्यो अरु कसको आश गर्नु ” रविन्द्रले सिधाकुरासँग भने, “सरकार र सङ्घसंस्थाले राहत भनेर हरेक परिवारलाई एउटा पाल र केही खाद्यान्न त दिए तर सानो पालले कति थेगोस्, राहतमा आउने खाद्यान्न पनि त्यस्तै हुने रहेछ” । 

गाउँमा धेरै जना वृद्धवृद्धामा अहिले श्वासप्रश्वासको समस्या बढेको छ । केही सुत्केरी र नवजात शिशुको स्वास्थ्य दैनिक बिग्रिएको छ । जिल्ला प्रशासन कार्यालय जाजरकोटले भने जिल्लामा विभिन्न निकायबाट प्राप्त सिरक, डसना, बल्याङ्केट, स्लिपिङ ब्याग, ज्याकेट वृद्धवृद्धा तथा बालबालिकालाई प्राथमिकतामा राखेर वितरण गरिएको छ । तर दैनिक चिसो बढिरहेको, तर न्यानो लत्ता कपडा पर्याप्त नभएकाले समस्या भैरहेको छ ।