खरानीको थुप्रोमा बतास लाग्न नदिऔं

नेपाल र नेपालीलाई माया गर्ने प्रिय देशवासी तथा विदेशमा रहेका आमा, बुबा, दाजु, भाई दिदी-बहिनीहरू । देश अहिले अत्यन्तै कठिन घडीमा आइपुगेको छ ।
स्थायी र अस्थायी दुवै सत्ताका संयन्त्र शून्य भएको छ । हिजोका सत्ता र संरचना मात्रै होइन हाम्रो धरोहर र वर्षौँदेखि आर्जित ऐतिहासिक सम्पत्ति पनि अब खरानी मात्रै बाँकी छ । 
एक आपसमा विश्वास कायम गर्नु र सद्भावको डोरीले मुलुकलाई बाँधेर जोगाउनु अब हामी सबैको एक मात्रै दायित्व बाँकी छ । आन्दोलनले आफ्नो उद्देश्य पुरा गरेको छ । तर, अब हामीले एक सचेत नागरिकका रुपमा हाम्रो खास दायित्व पुरा गरेर आन्दोलनमा शहिद भएकाहरुको आत्मा, घाइतेको घाउ र दुखेको देशलाई मल्हम लगाउने बेला आएको छ। 

यो विषम परिस्थितिमा हामीले हाम्रो घर देखि टोल, समाज, कार्यालय, गाउँ हुँदै सहरसम्म आफैंले आफैंलाई सम्हाल्न सकेनौँ भने इतिहासकै खराब समय झेल्न अब टाढा जानु पर्दैन ।

त्यसैले एक जिम्मेवार समाचार संस्थाको रुपमा हामी यहाँहरु सबैलाई विनम्र पूर्वक अनुरोध गर्छौँ सामाजिक भाइचाराका लागि हामी सबै तयार होऔं । राज्य शून्यताको अवस्थाबाट परिवार, समाज र राष्ट्रलाई जोगाऔँ । 

नेपाली सेना नेतृत्वको वर्तमान राष्ट्रिय सुरक्षा संयन्त्रलाई पूर्ण विश्वास, भरोसा र स्वीकार गरौँ । यही संविधान र देशको गणतान्त्रिक व्यवस्थाबाट उन्नत राजनीतिक थिति बसाल्न सेनाको रचनात्मक र समन्वयकारी भूमिकाका लागि खबरदारी गरौँ । देशको सार्वभौमिकता र आन्तरिक सुरक्षाका लागि बर्दी बिनाको सेनाका रुपमा निस्वार्थ नागरिकको कर्तव्य पालना गरौँ । 

एउटा गलत सूचना सिंहदरबारमा झोसिएको आगोको मुस्लो भन्दा पनि भयानक हुनसक्छ भन्ने हेक्का राखौँ । तपाईंसँग आफ्नै आँखाले देखेको र आफैंले प्रमाणित गरेको तथ्य सूचना छैन भने हल्लाका कुरा समाज र सञ्जालमा नफैलाऔँ ।

राजनीतिक वा गैरराजनीतिक मान्छेले राजनीतिक द्वेष र विभाजनका कुरा आजै छोड्नुहोस् । सबै राम्रो हुन्छ । अब ठिक हुन्छ भन्ने राम्रो सन्देश बाँड्नुहोस् । हिंसा, विभाजन, द्वेष र भ्रामक सूचना फैलाउने आफ्नैलाई पनि रोक्नुहोस् ।

राज्यको विशेष प्राथमिक क्षेत्रका आपत्कालीन र आपूर्ति व्यवस्थामा तपाई कार्यरत हुुनुहुन्छ भने त्यसलाई सूचारु गर्न भरपुर सहयोग गर्नुहोस् । तपाईको वरपरको असहायलाई पहिचान गरेर सहयोगको हात फैलाउनुहोस् । आन्दोलनले अस्वीकार गरेका राजनीतिक दल र संस्था कुण्ठाबाट परै रहनुहोस् । 

आन्दोलनले स्वीकार गरेका राजनीतिक दल र संस्थाले देश र आन्दोलनको मर्म बुझेर सहकार्य र सहमतिको राजनीति थाल्नुहाेस् । देश जलेर धुवाँले आकाश धुम्म छ, धर्तीमा खरानीको थुप्रो छ। खरानीको थुप्रोमा बतास लाग्न नदिऔं ।