एअर इण्डियाले भारतमा नेपाली अलपत्र पारेको विषय प्राधिकरणलाई छैन जानकारी : नागरिक उड्डयन प्राधिकरण

काठमाडाैँ : नेपाल नागरिक उड्डयन प्राधिकरणले एअर इण्डियाको लापरवाहीले भारतमा अलपत्र परेका नेपालीहरुको विषय आफूहरुलाई जानकारी नभएको बताएको छ । 

Watch On

प्राधिकरणका सूचना अधिकारी ज्ञानेन्द्र भूलले आफूहरुलाई यस समाचार प्रकासित हुने समयसम्म आफूहरुलाई उक्त विषयबारे जानकारी नभएको र यदि त्यस्तो समस्यामा कोही परेको भए प्राधिकरणको सम्पर्कमा आउन समेत आग्रह गरेका छन् । 

‘अहिलेसम्म हामीलाई कुनै पनि जानकारी छैन । भरखरै तपाईँहरुले भनेपछि थाहा भयो । यदि त्यस्तो समस्यामा कोही पर्नुभएको छ भने प्राधिकरणको सम्पर्कमा आउन अनुरोध गर्छु ।’, सूचना अधिकारी भूलले भने । 

त्यस्तै उनले यस विषयमा एअर इण्डियालाई सोधेर यदि त्यस्तो भए कारबाही गर्ने बताए । उनले भने, ‘एकपटक हामीसँग सम्पर्कमा आउन उनीहरुलाई भन्नुस्, यदि त्यस्तो रहेछ भने हामी उनीहरुलाई पत्र काटेर कारबाही अघि बढाउछौँ ।’

एअर इण्डियाले ५ डिसेम्बरमा जापान जान लागेका २४ नेपालीलाई बिहान १०ः५ बजेको उडान भर्ने बताएपनि उक्त एअरले उनीहरुलाई रातिको १० बजेमात्र उडाएको थियो । जसका कारण भारतबाट थाइल्याण्ड हुँदै जापान जाने ‘कनेक्टीङ फ्लाइट’ छुटिसकेका थिए । 

६ डिसेम्बर, बिहान ४ बजे भारतको इन्दिरागान्धी विमानस्थलमा पुगेका उनीहरुलाई अहिलेसम्म पनि गन्तव्यमा पठाएको छैन । विद्यार्थीहरुका अनुसार ३० घण्टा देखि एयर इन्डियाले ‘कनेक्टीङ फ्लाइट’को व्यवस्थापन गर्दैछौँ भन्ने जवाफ दिने गरेको छ ।

यस विषयमा एयर इण्डियाको नेपाल स्थित कार्यालयका कोही पनि अधिकारी सम्पर्कमा आउन चाहेनन् । 

'एयर इन्डिया'को लापरवाही, जापान उडेका २४ नेपाली विद्यार्थी ३० घण्टादेखि भारतमा अलपत्र (भिडियो सहित)