समानान्तर निर्माण सेवालाई ३ वर्ष कालो सूचीमा राख्न काठमाडौं महानगरको सिफारिस

काठमाडौँ । समानान्तर निर्माण सेवा नामक ठेकदार कम्पनीलाई काठमाडौं महानगरले कारबाही गरेको छ ।

Watch On

काठमाडौँ महानगरपालिका भित्र ठेक्का पट्टामा रजगज जमाएको उक्त ठेकदार कम्पनीले गलत विवरण पेश गरेर ठेक्का हत्याउन खोजेपछि महानगरले ३ वर्षका लागि सो कम्पनीलाई कालो सूचीमा राख्न सार्वजनिक खरिद अनुगमन कार्यालयलाई सिफारिस गरेको हो । 

ठेक्का प्रक्रियामा रहेको एक परियोजनामा उक्त कम्पनीले छल गरेर विवरण पेश गरेको भेटिएको महानगरपालिकाले जनाएको छ । 

महानगरले खरिद प्रक्रिया थालेको सामाखुसी बसुन्धारा म्हेपी करिडोर निर्माण कार्यका लागि माग गरिएको प्रस्तावमा समानान्तरले महानगरलाई ढाँटेर विवरण पेश गरेको पाइएको एक उच्च अधिकारीले सिधाकुरालाई जानकारी दिए । 

‘महानगरसँगको ठेक्का प्रक्रियामा यस अघि कुनै विवाद भए नभएको विषय खरिद प्रक्रियाको आवेदनमा खुलाउनु पर्ने थियो,’ महानगर स्रोत भन्छ, ‘तर, ठेक्का हत्याउन सो कम्पनीले यस अघि महानगरको सार्वजनिक खरिदमा कुनै विवाद (डीस्प्युट) नभएको भनी विवरण पेश गरेको पाइयो ।’ 

समानान्तरले आर्थिक वर्ष २०७७ र ७८ मा हात पारेको महानगरको केन्द्रिय कार्यालयको भवन निर्माणमा विवाद छ । तर, सो विवाद नरहेको भनी निर्माण कम्पनीले नयाँ ठेक्काका लागि प्रस्ताव पेश गरेको महानगरका अधिकारीहरू बताउँछन् । 

महानगरका अन्य परियोजनामा पनि हात हालेको सो कम्पनीले सस्तोमा ठेक्का हात पार्ने र काम अलपत्र पारेर महानगरको विकासको गति नै रोक्ने गरेको अधिकारीहरू बताउँछन् ।

‘खरिद नियमले प्रतिस्पर्धामा आएका मध्ये सबै भन्दा सस्तो प्रस्ताव गर्नेले ठेक्का पाउँछ तर त्यो काम नगर्ने नियत समानान्तरको यस अघिको ठेक्कामा देखियो, महानगरका अधिकारी भन्छन् । 

यस पटक पनि सो कम्पनीले विवरण नै छल गरेर प्रस्ताव पेश गरेपछि प्रमुख प्रशासकीय अधिकृत स्तरबाटै निर्णय गरेर कालो सूचीमा सिफारिस गरिएको महानगरले जनाएको छ ।