त्रिशुलीमा बेपत्ता भएकाका परिवार भन्छन्, 'सरकार भएको आभाष भएन' (भिडियाे)

बारा । त्रिशूलीमा दुईवटा बस खसेको चार दिन बितेको छ । आफन्तहरूलाई परिवारका सदस्य बेपत्ता हुनुको पीडा त छ नै उनीहरूले सरकार भएको आभास समेत नभएको गुनासो गरेका छन् ।

आइतबार सिधाकुरा टिम सिमताल दुर्घटनामा बेपत्ता भएका बाराको प्रसौनी गाउँपालिका वडा नम्बर १ नकटुवाका ताराचन्द्र राउत कुर्मीको घर पुगेको थियो । ताराचन्द्रसँगै उनकी पत्नी कुश्मी देवी उक्त दुर्घटनामा बेपत्ता भएका छन् । हामी त्यहाँ पुग्दा बेपत्ताका परिवारले आफन्तको कुनै खबर नहुनुको पीडासँगै सरकारले बेवास्ता गरेको आक्रोश मिश्रित गुनासो हामीलाई पोखे । 

ताराचन्द्र र उनकी पत्नी काठमाडौँको एक अस्पतालमा उपचाररत आफन्त भेट्न काठमाडौँ निस्केका थिए । वीरगञ्ज महानगरपालिका वडा नम्बर १४ चिनीमिल पिपराका प्रकाश पटेलले आफ्नै नाममा उनीहरूको टिकेट काटेका थिए । दुवै जना राति साढे ७ बजे वीरगञ्जको बसपार्कबाट बस समातेका थिए । तर उनीहरु काठमाडौँ पुग्नै पाएनन् । उनीहरु चढेको बस त्रिशुलीमा बेपत्ता भएको खबर पाएदेखि उनीहरूको परिवारले चुलो समेत बालेका छैनन् । 

ताराचन्द्रका कान्छा छोरा अनोज पटेलले घटना भएको यत्तिका दिन बितिसक्दा बाबुआमाको अवस्था अझै अज्ञात हुनुका दुख व्यक्त गरे । साथै उनले यति ठूलो घटनाका सरकारले चासो नदेखाएको प्रति पनि गुनासो गरे । 

स्थानीयले पनि यत्तिका दिनसम्म बस समेत पत्ता लगाउन नसक्नुमा सरकारको कमजोरी रहेको बताए । विश्वमा प्रविधि विकास भएपनि हाम्रोमा ति प्रविधिको प्रयोग हुन नसक्नुमा सरकारकै उदासिनता रहेको स्थानीय ललन पटेल बताउँछन् । 

परिवारले कि त सास कि त लास भएपनि पत्ता लगाइदिन माग गरेका छन् ।  

असार २८ गते बिहानको समयमा  नारायणगढ–मुग्लिन सडकखण्डको सिमलतालमा वीरगञ्जबाट काठमाडौँ जाँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौँबाट गौरतर्फ आउँदै गरेको बागमती प्रदेश ०३२४९५ ख ००१ नम्बरको गणपति डिलक्स बस पहिरोसँगै त्रिशूली नदीमा खसेका थिए । नेपाली सेना, नेपाल प्रहरी र सशस्त्र प्रहरीको टोलीले खोजी जारी राखेका छन् ।

खोजी कार्यलाई थप प्रभावकारी बनाउनका लागि उच्चस्तरको सोनार डिभाइस प्रविधि प्रयोग गरिएको छ । सशस्त्र प्रहरी बल नेपाल प्रधान कार्यालय, हलचोकबाट कुरिनटार लगिएको सो डिभाइसमार्फत खोजीकार्य गरिएको हो । उक्त प्रविधि २०० मिटर गहिराइसम्मको जुनसुकै बस्तु पनि पत्ता लगाउने खालको रहेको सशस्त्रले जनाएको छ । बसका यात्रु मध्ये केहिको शव दुर्घटनास्थलभन्दा निकै पर भेटिएको छ । भेटिएका शवहरुको आफन्तहलाई देखाउदै सनाखत गरिएको छ । हालसम्म दुर्घटनामा बेपत्ता भएका ११ जनाको शव भेटिएको छ ।