प्रेमी र उनका आफन्त मिलेर भीरबाट खसाले, गम्भीर घाइतेको ढुङ्गाले हानेर हत्या गरे

काठमाडाैँ । सुन्दरीजलमा मृत भेटिएकी राम दुलारीको हत्या भएको खुलासा भएको छ । जिल्ला प्रहरी परिसर काठमाडौँले आइतबार एक प्रेस वक्तव्य सार्वजनिक गर्दै यस्तो बताएको हो ।

Watch On

भदौ २० गते गोकर्णेश्वर नगरपालिका १ सुन्दरीजलमा ढुङ्गाको कापमा भेटिएको उनको शव उनकै प्रेमी र उनका सहयोगीले भीरबाट खसालेर घाइते बनाई ढुङ्गाले हानेर हत्या गरेको पाइएको प्रहरी अनुसन्धानमा खुलेको हो । 

शङ्कास्पद मृत्युको आशङ्कामा प्रहरीले थालेको अनुसन्धानमा उनको योजनाबद्ध रुपमा विभत्स हत्या भएको जिल्ला प्रहरी परिसरका प्रवक्ता प्रहरी उपरीक्षक नवराज अधिकारीले जानकारी दिए । 

अधिकारीका अनुसार हत्या भएकी महिला सिराहा घर भई काठमाडौँको बसुन्धारा बस्दै आएकी थिइन् । सामान्य मजदुरी गर्दै आएकी उनी सर्लाही चक्रघट्टा ३ का राम विनय महरासँग प्रेम सम्बन्धमा थिइन् । 

बसुन्धारामै जुत्ता सिलाउने काम गर्ने महराले आफ्नी प्रेमिका अन्य पुरुषसँग पनि सम्बन्धमा रहेको थाहा पाएपछि आफ्नो नाता लाग्ने सर्लाही बसगरिया ५ का सन्तोष राम महरासँग मिलेर हत्या गरेको बयान दिएको प्रहरीले जनाएको छ ।

‘अग्लो ठाउँमा चढाएर धकेलेर ढुङ्गामा झारेको र घाइते भएको अवस्थामा माथिबाट ढुङ्गाले हानेर हत्या गरेको प्रारम्भिक अनुसन्धानमा देखिएको छ,’ प्रहरी उपरीक्षक अधिकारीले भने । 

मृतकको परिवारका सदस्यहरू अझै सम्पर्कमा नरहेको पनि प्रहरीले जनाएको छ । उनीहरु पछिल्लो २ वर्ष देखी प्रेम सम्बन्धमा रहेको खुलेको छ ।