काठमाडौँ । वीरगञ्ज महानगरपालिकाका मेयर राजेशमान सिंहविरुद्ध  भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले आज सिंहसहित ७ जना विशेष अदालतमा भ्रष्टाचार मुद्दा दायर गरेको हो ।

मेयर सिंहविरुद्ध यसअघि पर्सा जिल्ला अदालतमा लिखत किर्ते लगायत कसुरमा चार वटा मुद्दा दायर भएको थियो । भ्रष्टाचारको मुद्दा दायर भएसँगै सिंह महानगरको मेयर पदबाट निलम्बित भएका छन् । 

Watch On

अर्काको छोरीलाई आफ्नो छोरी दाबी गरी झुटो विवरणका आधारमा नेपाली नागरिकता दिलाएको आरोपमा उनीहरूविरुद्ध आरोपपत्र दायर गरिएको आयोगले जनाएको छ ।

मेयर सिंहले सिन्धुपाल्चोक, इन्द्रावती गाउँपालिका वडा नम्बर १० की रीता भट्टराईकी छोरी रुविना श्रेष्ठलाई आफ्नी छोरी बनाएर नागरिकता दिलाएका थिए । रुविनालाई नागरिकता दिलाउन उनले स्थानीय जनप्रतिनिधि र कर्मचारीहरूसँग मिलेमतो गरेको अख्तियारको दाबी छ ।

२०७१ साल कात्तिक २० गते वीरगञ्ज महानगरपालिका वडा नं ३ को कार्यालयमा रुविना श्रेष्ठको झुटो विवरण राखी जन्मदर्ता प्रमाणपत्र बनाइएको थियो । सोही जन्मदर्ता प्रमाणपत्रका आधारमा वडाबाट सिफारिस गराई जिल्ला प्रशासन कार्यालय, पर्साबाट २०७५ साल साउन १३ गते रुविनाको नाममा नागरिकता जारी गरिएको थियो ।

अख्तियारले मेयर सिंह र बालिकाकी आमालाई यो अवैध काम गराउन मुख्य सहयोगी बनेको अभियोग लगाएको छ ।

त्यसैगरी, तत्कालीन वडा सचिव भिखारी राय र तत्कालीन वडा सदस्य तथा कार्यवाहक वडा अध्यक्ष तैफुल अख्तर ठकुराईमाथि जानीजानी गलत सरकारी कागजात (जन्मदर्ता र नागरिकता सिफारिस) तयार पारेको आरोप छ ।

गलत विवरणका आधारमा नागरिकता जारी गर्ने प्रक्रियामा संलग्न रहेको भन्दै जिल्ला प्रशासन कार्यालय, पर्साका तत्कालीन प्रशासकीय अधिकृत षडकुमार पोखरेललाई पनि मुद्दामा प्रतिवादी कायम गरिएको छ ।

यस ‘गैरकानूनी नागरिकता प्रकरण’को सत्यतथ्य बुझ्न गृह मन्त्रालयले एउटा छानबिन समिति गठन गरेको थियो । तर, उक्त समितिका संयोजक एवं तत्कालीन उपसचिव पुस्कर राना र सदस्य एवं तत्कालीन शाखा अधिकृत परशुराम पोखरेलले दोषीहरूलाई बचाउने उद्देश्यले गलत प्रतिवेदन तयार पारेको भन्दै उनीहरूलाई पनि प्रतिवादी कायम गरिएको छ ।

उनीहरूले घटनाको गम्भीरतालाई लुकाउन र अनुसन्धानलाई प्रभावित पार्न ‘जिल्ला प्रशासन कार्यालय र वडा कार्यालयबाट कागजातहरू नष्ट भइसकेका छन्’ भनी झुटो विवरण लेखी प्रतिवेदन बुझाएका थिए ।

सरकारी प्रतिवेदनमा बदनियतपूर्वक गलत विवरण लेखेको भन्दै उनीहरू दुवै जनालाई प्रतिवादी कायम गरिएको अख्तियारद्वारा जारी विज्ञप्तिमा उल्लेख छ ।

मेयर सिंहले अर्काको छोरीलाई नक्कली कागजात बनाई नागरिकता बनाइदिएको विषयको पर्दाफास सिधाकुराले गरेको थियो ।

राजेशमान सिंहबारे सिधाकुराले गरेको श्रृङ्खलावद्ध खुलासा:

EXCLUSIVE : नागरिकता किर्तेमा वीरगंज महानगरका मेयर राजेशमान सिंह (भिडियोसहित)

वीरगंजका मेयर राजेशमान सिंहविरुद्ध थप १५ जनाले दिए जाहेरी

वीरगंजका मेयर राजेशमान सिंह माथि छानबिन गर्न समिति गठन

समाचार टिप्पणी :राजेशमानको उध्रिएको मुकुट !

वीरगंजका मेयर राजेशमान सिंहविरुद्धको नागरिकता किर्ते प्रकरणमा परमादेश माग गर्दै उच्च अदालतमा निवेदन दर्ता

वीरगंजका मेयर राजेशमान सिंहको नागरिकता किर्ते प्रकरणः अनुसन्धानको प्रगति विवरण पेश गर्न उच्चको आदेश

वीरगञ्जका मेयर राजेशमान सिंहविरुद्ध पर्सा अदालतमा ४ वटा मुद्दा दायर

वीरगंजका मेयर राजेशमान सिंहविरुद्ध पक्राउ पुर्जी जारी

वीरगन्जका मेयर राजेशमानलाई प्रहरीको नाटकीय पक्राउ, थुनछेकका लागि अदालतमा लगियो

यस्तो छ अख्तियारको विज्ञप्ति